Պայթյուն՝ Լոնդոնի կենտրոնում․ խոշոր հրդեհ է բռնկվել

Լոնդոնում մետրոյի Elephant & Castle կայարանի մոտ պայթյուն է որոտացել, ինչի հետևանքով խոշոր հրդեհ է բռնկվել։

Հրշեջները փորձում են մարել կրակը։ Հրդեհվել են առևտրային շինություններ, ավտոմեքենաներ, ասվում է հրշեջ ծառայության տարածած հաղորդագրության մեջ, գրում է «ՌԻԱ Նովոստին»։

«Elephant and Castle կայարանի մոտ՝ երկաթուղու կամարների տակ գտնվող երեք առևտրային օբյեկտներն ամբողջությամբ, ինչպես նաև չորս մեքենա և հեռախոսային կրպակ այրվում են: Ճանապարհները փակ են, մարդկանց խորհուրդ է տրվում խուսափել տարածք այցելելուց և փակ պահել պատուհաններն ու դռները»,- ասված է Twitter-ում տեղադրված հաղորդագրության մեջ:

Դեպքի վայրում աշխատում է 10 հրշեջ մեքենա ու 70 հրշեջ։