Իտալական «Կիևոն» ճանաչվել է սնանկ ու վերջնականապես դուրս է մնացել Բ սերիայից: Այս մասին հաղորդում է Football Italia-ն:
Ակումբը բողոքարկել է որոշումը, սակայն մերժում է ստացել: Բ սերիայում «Կիևոյի» տեղը կզբաղեցնի «Կոզենցան», իսկ «Կիևոն» նոր մրցաշրջանը կսկսի սիրողական D սերիայում:
Ակումբը սնանկ է ճանաչվել տնտեսական վիճակի ստուգումից հետո, քանի որ չի կարողացել հիմնավորել իր տնտեսական կայունությունը:
Նախորդ մրցաշրջանում ակումբը 38 խաղում վաստակել էր 56 միավոր՝ զբաղեցնելով Բ սերիայի մրցաշարային աղյուսակի 8-րդ հորիզոնականը:
«Կիևոն» հիմնադրվել է 1929 թվականին, մասնակցել է Ա սերիայի 17 մրցաշրջանի: Ակումբի ամենալուրջ հաջողությունը եղել է չեմպիոնությունը Բ Սերիայում՝ 2007-2008 մրցաշրջանում:
.gif)
