Սիսիանի նախկին քաղաքապետը կմնա կալանքի տակ. Վերաքննիչ դատարանը մերժել է բողոքը

Ինչպես ի սկզբանե նախանշել էինք Վերաքննիչ քրեական դատարանը մերժել է Սիսիանի քաղաքապետ, «Հայաստան» դաշինքի պատգամավոր Արթուր Սարգսյանի նկատմամբ կալանավորումը որպես խափանման միջոց ընտրելու որոշման դեմ բողոքը։ Այս մասին հայտնում է Արթուր Սարգսյանի պաշտպան Էմին Խաչատրյանը։

Պաշտպանի խոսքով՝ իրենց համար սպասելի էր նման որոշումը։ «Մենք համոզված էինք, որ Վերաքննիչ քրեական դատարանը նման որոշում կկայացնի։ Որոշումը ստանալուց և ծանոթանալուց անմիջապես հետո դիմելու ենք Վճռաբեկ դատարան»,- նշեց պաշտպանը։

Հիշեցնենք, որ Արթուր Սարգսյանը մեղադրվում է Սիսիանի համայնքապետարանում հայտնաբերված չարաշահումների դեպքի առթիվ քննվող քրեական գործով։