Վրաստանի կառավարությունը հրաժարվել է Եվրամիության ֆինանսական աջակցության հաջորդ տրանշից: Այս մասին ասել է երկրի վարչապետ Իրակլի Ղարիբաշվիլին ՝ այս քայլը բացատրելով Վրաստանի տնտեսական աճով և նման օգնություն ստանալու անհրաժեշտության բացակայությամբ:
Կառավարության ղեկավարի խոսքերով ՝ եվրոպական օգնության երկրորդ տրանշից հրաժարվելու հիմնական պատճառը Թբիլիսիի՝ արտաքին պարտքը նվազեցնելու ցանկությունն է:
Խոսքը 75 միլիոն եվրոյի օգնության ծրագրի մասին է, որի հատկացումը հարցականի տակ հայտնվեց այն բանից հետո, երբ իշխող «Վրացական երազանք» կուսակցությունը դուրս եկավ ընդդիմության հետ համաձայնությամբ ստանձնած իր պարտավորություններից: Համաձայնությունը ձեռք էր բերվել Եվրոպական խորհրդի ղեկավար Շառլ Միշելի նախաձեռնությամբ և դրա իրականացումը ֆինանսական օգնություն ստանալու պայմաններից մեկն էր:
Մինչդեռ, որոշ դիտորդներ կարծում են, որ ֆինանսավորումից ձևական հրաժարվելը վատ խաղից լավ դուրս գալու փորձ է: Տնտեսական հարցերով փորձագետ Գեորգի Խուխաշվիլիի կարծիքով՝ կառավարությունը ձևացնում է, թե իբր իրենք են հրաժարվել գումարներից, այլ ոչ թե ԵՄ -ն է հրաժարվել ֆինանսավորումից:
.gif)
