Սահմանադրական բարեփոխումների հարցը՝ քաղհասարակության հետ հանդիպման պատճառ

Արդարադատության նախարար Կարեն Անդրեասյանը Սահմանադրական բարեփոխումներ իրականացնելու հարցը քննարկել է Հելսինկյան քաղաքացիական ասամբլեայի Վանաձորի գրասենյակ, Բաց հասարակության հիմնադրամներ– Հայաստան, Իրազեկ քաղաքացիների միավորում, Թրանսփարենսի Ինթերնեշնլ հակակոռուպցիոն կենտրոն, «Իրավունքի Եվրոպա միավորում», «Իրավունքների պաշտպանություն առանց սահմանների», Իրավունքի զարգացման և պաշտպանության հիմնադրամ և Խաղաղության երկխոսություն հասարակական կազմակերպությունների ղեկավարների ու ներկայացուցիչների հետ։ Այս մասին տեղեկանում ենք ԱՆ տեղեկատվության և հասարակայնության հետ կապերի վարչությունից։

Նախարար Անդրեասյանը կարևորել է երկրի մայր օրենքի բարեփոխումների վերաբերյալ ներառական քննարկումներ անցկացնելու անհրաժեշտությունն ու նախնական կարծիքներ լսելու համար ներկայացրել երեք հարց սահմանադրական բարեփոխումների հանձնաժողովի կազմն ու գործունեությունը վերափոխելու ու վերաիմաստավորելու, կառավարման ձևի ընտրության, ինչպես նաև դատական ատյանների միավորման, այդ թվում` բարձրագույն ատյանների միավորման միջոցով Գերագույն դատարանի ստեղծման նպատակահարմարության կամ վերաքննիչ և վճռաբեկ ատյանների միավորման վերաբերյալ: Ծավալված քննարկման ավարտին նման ձևաչափով հանդիպումները շարունակելու պայմանավորվածություն է ձեռք բերվել։