ՀԱՐՑ. Լսել եմ, որ եթե դառնում ես «Աքիլլես» ավտովարորդների իրավունքների պաշտպանության կենտրոնի անդամ, ապա ճանապարհային ոստիկանության եւ վարորդի միջեւ խնդիրներ առաջանալու դեպքում այդ կազմակերպությունը մշտապես օգնում է քաղաքացուն ու պաշտպանում է նրա իրավունքները: Եթե դա այդպես է, ինչպե՞ս կարող եմ դառնալ այդ կազմակերպության անդամ:  Վարդան Բալայան, 40 տարեկան, ճարտարապետՊԱՏԱՍԽԱՆ. Այո՛, եթե քաղաքացին մեր կազմակերպության անդամ է, ապա մենք նրան մշտապես սատարում ենք: Կազմակերպության անդամ դառնալու համար նախ քաղաքացին ընդունում է մեր կանոնադրությունը, դիմում է լրացնում կազմակերպության անդամ դառնալու համար, վճարում է 10.500 դրամ անդամավճար մեկ տարվա համար եւ մեկ լուսանկար: Մեր կողմից ստանում է վկայական եւ դառնում «Աքիլլես» կազմակերպության անդամ: Այդ մեկ տարվա ընթացքում եթե խնդիրներ են առաջանում վարորդի ու ճանապարհային ոստիկանության միջեւ, մենք իրեն օգնում ենք, իսկ մնացած քաղաքացիներին միայն խորհուրդ ենք տալիս: «Աքիլլես» ավտովարորդների իրավունքների պաշտպանության կենտրոնի տնօրեն Էդիկ Հովհաննիսյան«ԺՈՂՈՎՈՒՐԴ». Վարորդ-ավտոտեսուչ հարաբերություններում միջնորդները քիչ չեն: Սակայն լավ կլիներ, վարորդների իրավունքները պաշտպանվեին ոչ միայն տվյալ հասարակական կազմակերպությանն անդամակցելու դեպքում, այլ ընդհանրապես: «Աքիլլես»-ի առաջարկի դեպքում ոչինչ չի մնում ենթադրել, քան այն, որ այս հասարակական կառույցը նշված ծառայությունն անդամավճարի դիմաց է իրականացնում:Ինչ խոսք, բոլորս էլ լավ գիտենք, որ մեր ժամանակներում անվճար ոչինչ չի լինում, բայց այս դեպքում էլ տեխզննության, ԱՊՊԱ-ի համար պարտադրված վճարող մեքենատերերը հիմա էլ իրենց իրավունքների պաշտպանության դիմաց պետք է վճարեն: Մի քիչ շատ չէ՞…