Լեհաստանի ներքին անվտանգության գործակալությունը ձերբակալել է մի քաղաքացու, որին կասկածում են Ռուսաստանի օգտին լրտեսության համար:
Այդ մասին, ինչպես տեղեկացնում է «Արմենպրես»-ը, հայտնել է հատուկ ծառայությունների համակարգող նախարարի մամուլի քարտուղար Ստանիսլավ Ժարինը:
«66-ամյա ձերբակալվածը լրտեսական գործունեություն է ծավալել հօգուտ ռուսաստանյան հետախուզության (Անվտանգության դաշնային ծառայութուն, ԱԴԾ) և գործել ի վնաս Լեհաստանի Հանրապետության շահերի»,-ասվում է նրա հայտարարության մեջ:
Ժարինի խոսքով՝ ապացույցները և դատավարական գործողությունները մատնանշում են, որ կասկածյալը կապված է մեկ այլ մարդու հետ, որին ներքին անվտանգության գործակալությունն ավելի վաղ էր ձերբակալել: Մամուլի քարտուղարը հավելել է նաև, որ տղամարդը մեղքը չի ընդունել: Նրան ժամանակավոր կալանավորել են երեք ամսով:
Լեհաստանի գլխավոր դատախազությունում ճշտել են, որ գործողությունն անցկացվել է Վարշավայի երկրամասային դատախազության կազմակերպված հանցավորության և կոռուպցիայի գործերի Մազովեցի բաժանմունքի դատախազի ցուցումով: Այնտեղ նաև հայտնել են ձերբակալվածի անունը՝ Ռադոսլավ Ս.: Նրան մեղադրանք է առաջադրվել «օտարերկրյա հետախուզության օգտին գործունեություն վարելուն օգնելու» համար:
.gif)
