«Ազատագրական շարժման» անդամները ոգևորված չեն եղել՝ «Հայաստան» խմբակցության ներկայացուցիչներին հրապարկում տեսնելով

«Ազատագրական շարժման» նախաձեռնած հանրահավաքներին բացի նախաձեռնող խմբի լիդերները՝ Կարին Տոնոյանը, Սոֆյա Հովսեփյանը, Նաիրի Հոխիկյանն ու այլոք, նաև խորհրդարանական ընդդիմադիր խմբակցությունների անդամների կարելի է հանդիպել։ ArmLur.am-ի տեղեկություններով՝ նախաձեռնության անդամներն այդքան էլ ոգևորված չեն եղել՝ «Հայաստան» խմբակցության ներկայացուցիչներին հրապարկում տեսնելով։ Ավելին՝ արհամարհական հայացքներ են նետել, իբրև թե չեն նկատում։

ArmLur.am-ի հետ զրույցում «Հայաստան» խմբակցության անդամ Քրիստինե Վարդանյանն ասաց, որ ինքն իրեն տված խոստման համաձայն՝ շարունակում է մասնակցել բոլոր այն ակցիաներին, որտեղ ազնվության նշույլներ և հայրենիքի ճակատագրի նկատմամբ մտահոգություն է տեսնում։ Նրա համոզմամբ՝ հատկապես պատերազմից հետո ծավալվող իրադարձությունները պետք է վեր լինեն ցանկացած տեսակի խմբակային շահերից։

Ինչ վերաբերում է նախաձեռնության անդամների կողմից իրենց ուղղված արհամարհական վերաբերմունքին, ապա պատգամավորն այսպես է արձագանքում․ «Ես նման դեպքի ծանոթ չեմ, հարթակ բարձրանալու հավակնություն էլ երբևէ չեմ ունեցել։ Բայց եթե մեկն ինձ մոտենա և ասի, որ իմ ներկայությունը խանգարում է հայրենիքի փրկությանը, ես երկար չեմ տատանվի, պարզապես կհեռանամ, միայն թե իրենք կարողանան փրկել այն»։

Սևակ Վարդումյան