ՓԱՇԻՆՅԱՆ-ԱԼԻԵՎ ՀԱՆԴԻՊՄԱՆ ՄԱՍԻՆ

Երեւանը եւ Բաքուն պայմանավորվել են վարչապետ Նիկոլ Փաշինյանի եւ նախագահ Իլհամ Ալիեւի հանդիպման մասին, որը կկայանա դեկտեմբերի 15-ին Բրյուսելում։ Ղեկավարները վերջին անգամ հանդիպել են հունվարի 11-ին Մոսկվայում՝ ստորագրելու տրանսպորտային միջանցքների ապաշրջափակման մասին համաձայնագիրը, որն այդպես էլ չի իրականացվել, նույնիսկ՝ մասամբ։ Ենթադրվում էր, որ ռազմական գործողությունների ավարտի մեկամյակի օրը՝ նոյեմբերի 9-ին, առաջնորդները կրկին կհանդիպեն ՌԴ նախագահ Վլադիմիր Պուտինի միջնորդությամբ, եթե ոչ անձամբ, այլ տեսակոնֆերանսի ձեւաչափով, բայց այս գագաթնաժողովը հետաձգվեց անորոշ ժամանակով, եւ դրա փոխարեն նորը ծագեց՝ միացյալ Եվրոպայի մայրաքաղաքում Արեւելյան գործընկերության հարթակում. գրում է коммерсанть-ը: «Ճիշտ է, Մոսկվայում, Երեւանում եւ Բաքվում ԽՏՎՎպՐրՈվՑՖ-ի զրուցակիցների կարծիքով՝ չարժե խոսել ձեւաչափերի միջեւ մրցակցության մասին, քանի որ ռուսական միջնորդությանն այլընտրանք պարզապես չկա։ Նոյեմբերի 20-ին Հայաստանի արտգործնախարարությունը հաստատել է վարչապետ Նիկոլ Փաշինյանի մասնակցությունն Ադրբեջանի նախագահ Իլհամ Ալիեւի հետ հանդիպմանը։ Այս մասին գերատեսչությունը հայտնել է ռուսական միանգամից երկու գործակալության՝ «Ինտերֆաքս»-ին եւ «ՌԻԱ Նովոստի»-ին: Բաքուն նույնպես համաձայնել է հանդիպմանը, ընդ որում՝ մի քանի ժամ առաջ, ինչի մասին հայտնել է Ադրբեջանի ԱԳՆ-ն։

Հարկ է նշել, որ ընդամենը երկու շաբաթ առաջ՝ պատերազմի ավարտի տարելիցին ընդառաջ, օրակարգում Նիկոլ Փաշինյանի եւ Իլհամ Ալիեւի բոլորովին այլ հանդիպում էր։ Այն պետք է տեղի ունենար ոչ թե եվրոպական, այլ ռուսական միջնորդությամբ՝ Վլադիմիր Պուտինի մասնակցությամբ։ Սակայն բառացիորեն վերջին պահին Նիկոլ Փաշինյանն ասաց. «Նոյեմբերի 9-ի հանդիպման մասին պայմանավորվածություն չկա»: Սրանից հետո ՌԴ նախագահի մամուլի քարտուղար Դմիտրի Պեսկովը խոստովանեց, որ հանդիպումը չի կայանա։ «Իհարկե, ինչ-որ փուլում նման շփումներ անհրաժեշտ կլինեն, բայց որպեսզի դրանք հնարավոր լինեն, անհրաժեշտ է երեք կողմերի համաձայնությունն ու պատրաստակամությունը»,- ասել է նա։

Շատ փորձագետների կարծիքով՝ այս հանդիպման խափանումը եւ դրա համար նախապատրաստված փաստաթղթի ստորագրումը նախադրյալ դարձավ նոյեմբերի 16-ին Հայաստանի եւ Ադրբեջանի սահմանին սրման համար, ինչը հանգեցրեց բազմաթիվ զոհերի։ Միաժամանակ սահմանին լարվածությունը պահպանվում է։ «Բրյուսելում հանդիպման մասին լուրը որոշակի անակնկալ էր, եւ տեղեկություններ կան, որ նախաձեռնությունը եղել է հայկական կողմից», – ԽՏՎՎպՐրՈվՑՖ-ին ասել է ադրբեջանցի քաղաքագետ, «Վալդայ» միջազգային քննարկումների ակումբի փորձագետ Ֆարհադ Մամեդովը:

«Բացի այդ, կարող ենք արձանագրել, որ Հայաստանը հրաժարվել է հանդիպել Մոսկվայի միջնորդությամբ՝ տրանսպորտային միջանցքների եւ սահմանի վերաբերյալ համաձայնագրերի ստորագրմամբ։ Ադրբեջանական դիրքորոշումն այն է, որ եթե Բրյուսելում կայանալիք հանդիպումը նպաստի այդ հարցերի վերաբերյալ որոշումների կայացմանը, ապա մենք չենք հրաժարվի դրանից»,- ընդգծել է Մամեդովը, որի համոզմամբ՝ Ռուսաստան-Հայաստան-Ադրբեջան եռակողմ ձեւաչափը, այնուամենայնիվ, կմնա հիմնականը եւ այլընտրանք չունի։

«Փաստն այն է, որ դեկտեմբերի 15-ին Նիկոլ Փաշինյանն ու Իլհամ Ալիեւը, այնուամենայնիվ, պետք է լինեին Բրյուսելում Արեւելյան գործընկերության գագաթնաժողովին մասնակցելու համար: Չեմ կարծում, որ բրյուսելյան հանդիպմանը կողմերը կստորագրեն այնպիսի փաստաթուղթ, որը համաձայնեցված չէ Մոսկվայի հետ»,- պարբերականին ասել է հայ քաղաքագետ Բենիամին Պողոսյանը։ Մեկ այլ հայ քաղաքագետ Հրանտ Միքայելյանն իր հերթին չի թաքցրել, որ Ռուսաստանի եւ հակամարտող երկու կողմերի միջեւ որոշակի դժգոհություն է կուտակվում, ինչը նրանց ստիպում է նոր ձեւաչափեր փնտրել։

«Ռուսաստանը չի արտահայտում իր դիրքորոշումը եւ փորձում է հանդես գալ ոչ հրապարակային, իսկ Թուրքիան, ընդհակառակը, բացահայտորեն աջակցում է Ադրբեջանին: Ավելին, Ռուսաստանը  որպես միջնորդ է հանդես գալիս բանակցություններում, որոնք հայկական կողմի համար չեն կարող ավարտվել ոչ մի դրական բանով»,- Երեւանի դժգոհության պատճառները պարբերականին բացատրել է Միքայելյանը։

ՌԴ ԳԱ Համաշխարհային տնտեսության եւ միջազգային հարաբերությունների ազգային հետազոտական ինստիտուտի Հետխորհրդային հետազոտությունների կենտրոնի ավագ գիտաշխատող Ստանիսլավ Պրիտչինը կարծիք է հայտնել, որ բանակցային ձեւաչափերում մրցակցության մասին խոսելու կարիք չկա։ Մոսկվայի միջնորդության առանցքային նշանակությունը պահպանելու մասին փորձագետների խոսքերը հաստատում է Նիկոլ Փաշինյանի՝ կիրակի օրը Վլադիմիր Պուտինին ուղղված զանգը։ Զրույցի ընթացքում Հայաստանի վարչապետը «երախտագիտություն է հայտնել Ռուսաստանի ակտիվ միջնորդական ջանքերի համար» եւ քննարկել «տարածաշրջանում տիրող իրավիճակը եւ դրա կայունացմանն ուղղված միջոցառումները»»։

Ն. Պ.

ԳԱՂՏՆԻ ՀԱՓՇՏԱԿԵԼ Է

ArmLur.am-ին հայտնի դարձավ, որ Վախթանգ Հովհաննիսյանին մեղադրանք է առաջադրվել այն բանի համար, որ նա, ուրիշի գույքի զգալի չափերով գաղտնի հափշտակություն կատարելու դիտավորությամբ 2021 թվականի փետրվարի 24-ին՝ ժամը 03:00-ի սահմաններում, օգտվելով Դավիթ Աշոտի Զաքարյանի եւ նրա ընտանիքի անդամների՝ տանից բացակայելու հանգամանքից, տեխնիկական միջոցների գործադրմամբ բացել է վերջինիս պատկանող, Վայք քաղաքի Շահումյան 62 հասցեում գտնվող առանձնատան հետնամասի եվրոպատուհանը, ապօրինի մուտք գործել առանձնատուն, որտեղից գաղտնի հափշտակել է 3 շիշ «Պարույր Սեւակ», «Կիլիկա» եւ «Դվին» տեսակի, 30 հատ ՍՍՀՄ ժամանակների արտադրության «Արարատ» տեսակի կոնյակներ, 3 հատ «Կրիստալ Նեմիրոֆ» տեսակի օղի, թեյի 4 հատ արծաթյա գդալ, «Ֆաբերլիկ», «Յուդաշկին», «Օրիֆլեյմ» եւ «Աակոստ» ֆիրմաների կանացի 4 հատ օծանելիքներ, 1 հատ չօգտագործված մազահեռացման սարք, 1 հատ ոսկե մեդալ եւ անկողնու 1 հատ գորգանման ծածկոց՝ Դավիթ Զաքարյանին պատճառելով խոշոր չափերով՝ շուրջ 2.035.000 ՀՀ դրամի գույքային վնաս։

ՈՐՈՇՈՒՄ՝ ԽԼՂԱԹՅԱՆԻ ԳՈՐԾՈՎ

ArmLur.am-ին հայտնի դարձավ, որ նախաքննական մարմինը Ռուբեն Խլղաթյանին մեղադրում է հանրորեն վտանգավոր արարքի կատարման համար. նա, Գագիկ Պետրոսյանի հետ նախնական համաձայնությամբ, խմբով փորձել են 2021 թվականի հունիսի 20-ին կայանալիք ՀՀ Ազգային ժողովի արտահերթ ընտրությունների նախընտրական փուլում կաշառք տալ ՀՀ Արմավիրի մարզի մի շարք ընտրողների: Հիշեցնենք, որ այս գործով ՀՔԾ-ն եւ Դատախազությունը բախվել էին: ArmLur.am-ին հասած տեղեկությունների համաձայն՝ ՀՀ գլխավոր դատախազությունը «Պատիվ ունեմ» դաշինքի կողմից պատգամավորության թեկնածու առաջադրված Արմավիրի նախկին քաղաքապետ Ռուբեն Խլղաթյանի նկատմամբ հարուցված քրեական գործով որոշում է կայացրել: Քրեական գործը կրկին ուղարկվել է Հաստուկ քննչական ծառայություն՝ քննության: Ըստ ArmLur.am-ին հասած տեղեկությունների՝ դատախազը չի հաստատում այս քրեական գործը եւ հետ է ուղարկում քննիչին, սակայն քննիչը կռիվ է տալիս, թե լրացուցիչ քննություն չի անի: Արդյունքում դատախազությունում այս օրերին քննարկում են Խլղաթյանի քրեական գործի ճակատագիրը՝ այն ուղարկել դատարան, թե ոչ:

Ի դեպ, մեզ հասած տեղեկությունների համաձայն՝ դատախազի եւ քննիչի կռիվը կապված է ապացույցների պակասի հետ: Գործը հսկող դատախազը ասել է, որ քրեական գործով ապացույց չկա, ու այս վիճակով գործը դատարան ուղարկել չեն կարող, իսկ քննիչն առարկել է, որ ուղարկեն: Ստացվում է, որ ՀՔԾ-ն չի կարողանում ապացուցել Խլղաթյանի մեղքը, իսկ Գլխավոր դատախազությունն էլ չի ուզում հիմնազուրկ գործ ուղարկել դատարան: Սակայն, ինչպես նկատեցինք, գործով որոշում է կայացվել, նախաքննության ավարտ է հայտարարվել, ու գործը ուղարկվել է դատարան:

ՀԵՌԱԽՈՍԱԶՈՒՅՑ

Բելառուսի նախագահ Ալեքսանդր Լուկաշենկոն եւ Հայաստանի վարչապետ Նիկոլ Փաշինյանը հեռախոսազրույց են ունեցել. հայտնում է Բելառուսի նախագահի կայքը։ «Նրանք միմյանց տեղեկացրել են Բելառուսում եւ Հայաստանում տիրող իրավիճակի մասին, քննարկել ՀԱՊԿ-ի շրջանակներում խնդրահարույց հարցեր։ Հայաստանի վարչապետը Բելառուսի նախագահին տեղեկացրել է նաեւ հայ-ադրբեջանական սահմանին տիրող իրավիճակի եւ դրա զարգացման հնարավոր ուղիների մասին»,- ասվում է հաղորդագրությունում:

ԴԻՄԵԼ Է ՄԻԵԴ

ՄԻԵԴ-ում ՀՀ ներկայացուցչի ֆեյսբուքյան էջի փոխանցմամբ՝ Հայաստանի Հանրապետությունը դիմել է Մարդու իրավունքների եվրոպական դատարան 2021թ. նոյեմբերի 16-ին Ադրբեջանի կողմից ՀՀ ինքնիշխան տարածքում սանձազերծված ագրեսիվ գործողությունների ընթացքում գերեվարված հայ զինծառայողների հիմնարար իրավունքների ապահովման պահանջով։  Եվրոպական դատարան է ներկայացվել Դատարանի կանոնների 39-րդ կանոնի ներքո Ադրբեջանի նկատմամբ միջանկյալ միջոց կիրառելու դիմում, որի նպատակն է երաշխավորել գերեվարված զինծառայողների՝ Մարդու իրավունքների եվրոպական կոնվենցիայով երաշխավորված կյանքի եւ խոշտանգումներից զերծ մնալու իրավունքների ապահովումը։

ԿԱՆՉՎԵԼ Է ՀԱՐՑԱՔՆՆՈՒԹՅԱՆ

Փաստաբան Ամրամ Մակինյանի փոխանցմամբ՝ ՀՀ երրորդ նախագահ Սերժ Սարգսյանը մեղադրյալի կարգավիճակով հարցաքննության է կանչվել Հակակոռուպցիոն կոմիտե: Ըստ փաստաբանի` Սերժ Սարգսյանը հարցաքննության է հրավիրվել գործարար Սիլվա Համբարձումյանի ցուցմունքի հիման վրա: «Եվ զավեշտն այն է, որ երեքուկես տարի Սիլվայի ցուցմունքը վերցնել-դնելով՝ այսօր «որոշել են», որ նա նաեւ Սերժ Սարգսյանին է կաշառք տվել, եւ դա այն դեպքում, երբ նույն գործով դեռեւս երկու տարի առաջ Սերժ Սարգսյանը հարցաքննվել է որպես վկա եւ մինչ օրս որեւէ նոր հանգամանք իրավական առումով չի փոխվել եւ չի ավելացել»,- հավելել է Մակինյանը:

ԱԼԻԵՎԸ ՀՐԱՎԻՐԵԼ Է

Ադրբեջանի նախագահ Իլհամ Ալիեւը հարավկորեական ընկերություններին հրավիրել է աշխատել Ղարաբաղի օկուպացված տարածքներում։ Նա ընդունել է Կորեայի Հանրապետության նախագահին առընթեր հյուսիսային տնտեսական համագործակցության հանձնաժողովի նախագահ Չժոն Սու Պակին., հայտնում են ադրբեջանական ԶԼՄ-ները։ «Հարավկորեական ընկերություններ ներգրավելու նպատակով կանցկացվի շնորհանդես»,- ասել է Ալիեւը։ Հանդիպմանը նաեւ քննարկվել են երկկողմ եւ բազմակողմ ձեւաչափերով, ինչպես նաեւ տնտեսական գոտիների միջեւ համագործակցության հնարավորությունները, կայացել է կարծիքների փոխանակցում տարբեր ոլորտներում հեռանկարների շուրջ՝ ներառյալ էներգիայի աղբյուրներ, տրանսպորտ, լոգիստիկա եւ տուրիզմ։