«ՄԻ ԿՈՂՄԸ ՊԵՏՔ Է ԳՆԱ ԶԻՋՈՒՄՆԵՐԻ, ՈՐՊԵՍԶԻ ԳՈՐԾԸՆԹԱՑՆ ԱՎԱՐՏՎԻ»

Սահմանազատման, սահմանագծման համար կարեւոր հանգամանքն այն է, թե որ թվականին հրատարակված քարտեզներով են առաջնորդվելու: Այս մասին ArmLur.am-ի հետ զրույցում ասաց ԱԱԾ սահմանապահ զորքերի նախկին հրամանատար Արմեն Աբրահամյանը: «Եթե ուզում են, որ գործընթացն արագ ընթանա ու ավարտվի, ապա ինչ-որ մի կողմը պետք է զիջի: Եթե Վրաստանի հետ, որի հետ որեւէ խնդիր չունի ՀՀ-ն, դեմարկացիա-դելիմիտացիան ընթանում է արդեն 20 տարուց ավելի, ապա Ադրբեջանի հետ ավելի շատ է տեւելու»,- նշեց նա:

-Պարո՛ն Աբրահամյան, Նիկոլ Փոշինյանը հայտարարում է, որ Ադրբեջանը վերահսկողության այն տարածքները, որոնք ադրբեջանական են, տալիս է ադրբեջաներեն անուններ: Նա նշում է, որ դեմարկացիա եւ դելիմիտացիա չի եղել: Այս պայմաններում  ընդունելի՞ է ասել, որ դրանք ադրբեջանական տարածքներ են, երբ չի եղել դեմարկացիա եւ դելիմիտացիա:

-Խորհրդային տարիներին դեմարկացիա եւ դելիմիտացիա արվել է ու շատ մանրակրկիտ: Կարծեմ 20թ., իսկ դրանից հետո ավելի մակերեսորեն են արել, ավելի մեծ քարտեզների վրա, մեծ մասշտաբների, որը շատ մեծ սխալներ է պարունակում: Այսինքն՝ որպեսզի մենք իմանանք, թե այդ տարածքները ումն են, վստահ եմ, որ դրանք մեր տարածքներն են: Կապան-Գորիս ճանապարհին այդ 21 կմ  մեր տարածքով է անցնում: Պետք է գնան բարձրացնեն  26-29թթ. դեմարկացիոն կատարված աշխատանքները, որովհետեւ լրիվ կոորդինատներով տրված է, մինչեւ վայրկյանների ճշտությամբ տրված է:  Բացի դրանից, այնտեղ կա տրված սահմանի նկարագիր, կարող է քարտեզը մի տեղ լինի, մի տեղ չլինի, կարող է շատ հին լինեն, բայց դրանց վրա գրված կոորդինատները թող դնեն քարտեզների վրա, բարձրացնեն:

-Ի՞նչ կարող է հետապնդել նման արտահայտություն անելը:

-Ես չեմ կարող այդ հարցին պատասխանել, դա քաղաքական հարց է: Ես մասնագիտական առումով ասում եմ, որ դրանք մեր տարածքներն են: Խորհրդային Հայաստանը չէր կարող իր կարեւոր կոմունիկացիան կառուցել մեկ այլ հանրապետության տարածքում:

-Այսօր մենք պատրա՞ստ ենք գնալ այդ գործընթացին: Նախորդ զրույցի ժամանակ Դուք մտահոգություն էիք հայտնում, որ անգամ Գեոդեզիայի ինստիտուտն են փակել: Մենք ինչպե՞ս ենք գնալու այդ ամենին:

-Մենք մտնելու ենք մի շրապտույտի մեջ եւ չենք կարողանալու դուրս գանք երկար ժամանակ:

-Ինչքա՞ն ժամանակ:

-Տարիներ շարունակ: Օրինակ՝ Վրաստանի սահմանը այդքան նորմալ փոխհարաբերություններում, մթնոլորտում, բարիդրացիական հարաբերություններում  իրար հետ չենք կարողացել 96թ.-ից մինչեւ հիմա լուծել: Այս ճնշման, պատերազմի պայմաններում ո՞նց կարող ենք այդ աշխատանքները կատարենք: Ես դա համարում եմ անհնարին: Գնալու են հանդիպեն  գան ու ոչ մի հարցով չեն կարողնալու իրար հետ ինչ-որ համաձայնության գալ: Սա շատ երկար պրոցես է: Նույնիսկ միջնորդավորված, ռուսների կողմից  էլ որ ցանկություն լինի արհեստական արագացնելու այդ պրոցեսը, մի կողմը պետք է գնա մեծ զիջումների, որպեսզի գործընթացն ավարտվի:

Զրուցեց ՍԵՎԱԿ ՎԱՐԴՈՒՄՅԱՆԸ

ՎԱՅՔԻ ԻՇԽԱՆԱԿԱՆ ԹԵԿՆԱԾՈՒՆ ԳՈՂՈՒԹՅՈՒՆ Է ԱՐԵԼ

Կարծես թե նշմարվում են հիմնական պատճառները, որոնք հանգեցնում են իշխող ուժի աննախադեպ պարտություններին ՏԻՄ ընտրություններում: Հիմնական պատճառը տեղերում թույլ թեկնածուներն են, սակայն հատկապես Վայք խոշորացվող համայնքում իշխող կուսակցության թեկնածուի անցյալը խիստ տպավորիչ է:

Բանն այն է, որ ՔՊ թեկնածու Մխիթար Մաթեւոսյանը Վայքի տարածաշրջանում հայտնի է որպես «կրիմինալ» անցյալ ունեցող անձ, որը, լինելով «Մավշին» ՍՊԸ-ի տնօրեն, պետությունից խաբեությամբ առանձնապես խոշոր չափի գումար հափշտակելու դիտավորությամբ, շինարարական աշխատանքների կատարման ընթացքում չիրականացված աշխատանքները կատարողական թերթերում ներառելով, պետության միջոցներից ավել է ստացել ընդհանուր 4.055.498.4 ՀՀ դրամ գումար` պետությանը պատճառելով առանձնապես խոշոր չափերի գույքային վնաս:

Սա դեռ ամենը չէ.  Վայքում մեր կողմից  անցկացրած հարցախույզի ընթացքում տեղացիները հայտնեցին, որ Մխիթարը 2000-ակաների սկզբներին շատ ծիծաղելի ու մինչեւ հիմա հիշվող գործով է անցել, երբ մեղադրվել է  այն ժամանակ Վայքում դատավոր Թոֆիլ Սամսոնիչիի  տան շինարարական աշխատանքների ժամանակ կաֆել-մետլախի գողության մեջ: Մեր աղբյուրները պնդում են, որ Վայքում իրավիճակը շատ մոտ է Կապանին ու Գորիսին, որտեղ ավելացել են սահմանամերձ գյուղերը, եւ մարդիկ ձգտելու են իրենց խոշորացված համայնքում տեսնել ոչ իշխանական, քիչ թե շատ մաքուր անցյալ ունեցող որեւէ մեկի ու չեն քվեարկելու սեփական ընտանիքը Երեւան տեղափոխած ու Վայքը որպես խոպան դիտարկող Մխիթար Մաթեւոսյանի օգտին:

Ուժային կառույցների մեր աղբյուրները հայտնում են, որ փորձել են քաղաքական ղեկավարությանը հասցնել իրենց սխալ ընտրության մասին, որ Մխիթարի մասով մարդկանց մեջ վստահություն չկա: Խոսում են, որ Վայքի խեղճուկրակ բյուջեն չի դիմանալու Մխիթարի ձեռքի տակ (թերեւս նման վստահության պատճառը նրա անցյալն է): Ուժային կառույցներում վստահ են, որ իրենց ներկայացրած օբյետիվ իրավիճակի գնահատականը ճանապարհին «կորել է» ու չի հասել երկրի առաջին դեմքերին, այլապես նման սարսափելի ու անհեռանկարային քայլի Վայքում չէին գնա:

Ի դեպ, քաղաքացիներից մեկն էլ քմծիծաղով ասաց, թե ջահել ժամանակ սիրում էր իրենց գյուղի թոնիրների ղազանները «թռցնել», այդ մարդուց ի՞նչ ղեկավար:

Ն. Հ.

ԱՇԽԱՏԱՆՔԻՑ ԱԶԱՏՈՒՄ ԵՆ

Կադրային ջարդ՝ Աջափնյակի թաղապետարանում. թաղապետի  աշխատակազմի բաժնի պետը դիմել է դատարան: Դատելով իրարվիճակից՝ թաղապետարանում կադրային ջարդ է սկսվել, ինչի հետ համամիտ չեն աշխատակիցները եւ դիմում են դատարան իրենց իրավունքները վերականգնելու համար: Մեզ հայտնի դարձավ, որ  Մարինե Կարապետյանը  դատի է տվել Աջափնյակ վարչական շրջանի ղեկավար Սասուն Մկրտումյանին՝ պահանջելով, որ դատարանը անվավեր ճանաչի ղեկավարի  որոշումը  եւ, որպես հետեւանք, հայցվորին Երեւանի Աջափնյակ վարչական շրջանի ղեկավարի աշխատակազմի ընդհանուր բաժնի պետի պաշտոնում վերականգնի եւ հարկադիր պարապուրդի ամբողջ ժամանակահատվածի համար, այն է՝ 01.11.2021 թվականի մինչեւ դատարանի վճիռն օրինական ուժի մեջ մեջ մտնելը միջին աշխատավարձի չափով չստացված աշխատավարձը հօգուտ հայցվորի բռնագանձի:

ՀԱՎԱՆԱԿԱՆՈՒԹՅՈՒՆԸ ՄԵԾ Է

Հայաստանի Հանրապետության զինված ուժերի գլխավոր շտապի պետի նախկին առաջին տեղակալ, գեներալ-լեյտենանտ Տիրան Խաչատրյանը չի բացառում, որ Սյունիքում կարող է կրկնվել Արցախի ճակատագիրը: Armlur.am-ի թղթակցի այն դիտարկմանը, թե կարող է արդյոք նման բան լինել, նա արձագանքել է. «Կարող է: Եթե համապատասխան կազմակերպում չիրականացվի  անվտանգության ապահովման, բանակի ուժեղացման, անհրաժեշտ խնդիրների կատարման, ունարկությունների մեծացման հետ կապված, պատերազմի հավանականությունը շատ մեջ է»: Նրա խոսքով՝ վերջին մեկ տարում այդ ամենին ուղղված որոշակի աշխատանքներ կատարվել են, բայց դա միանշանակ բավարար չէ. «Մենք պետք է ցույց տանք, որ ուժեղ ենք, համապատասխան հակահարված կամ անդրադարձում ինչ-որ քայլերի ունակ ենք իրականացնելու: Եթե դա չիրականացվեց, միանշանակ շարունակությունը անցանկալի կլինի»,- ընդգծել է գեներալը: Այն հարցին, թե Ադրբեջանը կստանա արդյոք իր համար այդքան ցանկալի միջանցքը, նա պատասխանեց. «Կարծում եմ՝ ոչ»: