Լավագույն բնական յուղերը՝ ծերացող մաշկը խնամելու և աչքերի շուրջն առաջացած մանր կնճիռներից ազատվելու համար

Առողջ ու երիտասարդ մաշկ ունենալու, ինչպես նաև ծերացման գործընթացը գոնե մի քանի տարով հետաձգելու մասին շատերն են երազում, սակայն հաճախ առաջին կնճիռները չափազանց անսպասելի են ի հայտ գալիս: Հայտնի է, որ որքան շուտ է մարդը սկսում պայքարել կնճիռների դեմ, այնքան երկար է մաշկը մնում թարմ ու երիտասարդ: Սակայն շատերը նախապատվությունը տալիս են քիմիական տարրերով հարուստ կոսմետիկ միջոցներին՝ մոռանալով, որ կան նաև նույնքան արդյունավետ ու շատ ավելի հասանելի բնական միջոցներ:

Ձեր ուշադրությանն ենք ներկայացնում լավագույն յուղերը, որոնք կօգնեն պահպանել մաշկի երիտասարդությունն ու խուսափել վաղաժամ կնճիռների առաջացումից:

1. Ժոժոբայի յուղ

Սա լավագույն միջոցն է աչքերի շուրջն առաջացած կնճիռներից ազատվելու համար: Այն պարունակում է վիտամիններ, հանքանյութեր, ամինաթթուներ ու օգտակար ճարպաթթուներ, որոնք բարենպաստ ազդեցություն են ունենում նուրբ մաշկի վրա:

Այս յուղը կարելի է օգտագործել որպես դիմակ, կամ մի քանի կաթիլ յուղ ավելացնել գիշերային կամ ցերեկային նրբաքսուքին: Այն անմիջապես ներծծվում է, ազատում է չորությունից և առաձգականություն ու թարմություն է հաղորդում մաշկին:

2. Գերչակի յուղ

Սա ամենահասանելի ու արդյունավետ յուղերից մեկն է, որը պարբերաբար օգտագործելու դեպքում կարելի է ազատվել աչքերի այտուցներից, մաշկի չորությունից ու մանր կնճիռներից: Այս յուղը կարելի է ինչպես համատեղել այլ յուղերի հետ, այնպես էլ օգտագործել որպես առանձին միջոց:

Գերչակի յուղն օգտագործելուց առաջ խորհուրդ է տրվում մի փոքր տաքացնել, այնուհետև մատների ծայրերով քսել մաշկին ու թույլ հարվածելով տարածել:

3. Կակաոյի յուղ

Կակաոյի յուղը պարունակում է օգտակար ճարպաթթուներ, վիտամիններ, ու տանիններ, որոնք օգնում են թարմացնել բջիջները, պաշտպանել մաշկն արտաքին միջավայրի վնասակար ազդեցությունից ու կանխել կնճիռների առաջացումը: Այս յուղը հեշտ է տարածվում, արագ ներծծվում է և չի ծանրաբեռնում մաշկը, ուստի կարող է ամենօրյա սնուցող նրբաքսուքին փոխարինող հիանալի միջոց լինել:

4. Կոկոսյան ընկույզի յուղ

Կոկոսյան ընկույզի յուղը դեմքի ու մարմնի մաշկի խնամքի ամենաարդյունավետ միջոցներից մեկն է, որը սնուցում է չոր մաշկը, պաշտպանում է արևի ճառագայթների վնասակար ազդեցությունից, կանխում է կնճիռների առաջացումն ու կարգավորում է նյութափոխանակությունը:

5. Խաղողի կորիզների յուղ

Այս յուղը հարուստ է բազմաթիվ օգտակար նյութերով, որոնք խնամում ու սնուցում են մաշկը: Այն առանձին օգտագործելու կամ այլ յուղերի հետ համատեղելու դեպքում կարելի է հեշտությամբ բարելավել մաշկի վիճակն ու դանդաղեցնել ծերացման գործընթացները:

Չոր մաշկի դեպքում խոևհուրդ է տրվում օգտագործել այս յուղը ժոժոբայի յուղի կամ կոկոսյան ընկույզի յուղի հետ խառնած, իսկ նորմալ ու յուղոտ մաշկի դեպքում՝ մաքուր վիճակում:

6. Կտավատի յուղ

Այս յուղը հիանալի միջոց է հասուն մաշկի համար, քանի որ օգնում է ազատվել կնճիռներից, տոնուս է հաղորդում մաշկին, խոնավեցնում է նուրբ մաշկն ու գունաբացում մուգ հետքերը և պեպենները: Օգտագործելուց առաջ կտավատի յուղը հարկավոր է մի փոքր տաքացնել, այնուհետև բամբակյա սկավառակի միջոցով քսել մաշկին: Յուղն անհրաժեշտ է թողնել 10 րոպե, այնուհետև լվացվել մաքուր ջրով:

Կտավատի յուղն օգտագործելիս խորհուրդ է տրվում խուսափել աչքերի շուրջը եղած հատվածից, քանի որ այն կարող է այտուցների առաջացման պատճառ դառնալ: Այս յուղը շատ օգտակար է նաև սննդամթերքի մեջ օգտագործելու համար: Այն ուտեստներին ավելացնելը կօգնի բարելավել մաշկի վիճակը, կանխել վաղաժամ ծերացումն ու կարգավորել մարսողությունը:

7. Դեղձի յուղ

Դեղձի կորիզների յուղը հարուստ է վիտամին E-ով, որը նպաստում է մաշկի երիտասարդացմանն ու օգնում է ազատվել մանր կնճիռներից: Այս յուղի հիման վրա պատրաստված կոմպրեսներն ու դիմակները կօգնեն առաձգականություն ու թարմություն հաղորդել մաշկին և կդարձնեն այն ավելի նուրբ ու թավշյա:

Այս յուղը խորհուրդ է տրվում օգտագործել քնելուց առաջ: Այն հարկավոր է մատների ծայրերով քսել մաշկին ու թույլ հարվածելով տարածել: Բացի այդ, այս յուղը կարելի է քսել նաև թարթիչներին ու հոնքերին՝ խթանելով դրանց աճն ու կանխելով մազաթափությունը:

8. Չիչխանի յուղ

Չիչխանի յուղը ոչ միայն կանխում է մաշկի տարիքային փոփոխությունները, այլև օգնում է ազատվել խորը կնճիռներից ու բարձրացնել ծերացող մաշկի տուրգորը: Սակայն հարկ է հիշել, որ այս յուղը մաքուր վիճակում չի կարելի օգտագործել: Այն հարկավոր է խառնել որևէ այլ յուղին կամ ավելացնել դրան մի քանի կաթիլ վիտամին E:

Որպեսզի յուղը լավ ներծծվի, այն քսելուց հետո հարկավոր է մի փոքր մերսել մաշկը: Նրբաքսուքներին խառնելու դեպքում այս յուղը շատ արագ կներծծվի, չի ծանրաբեռնի մաշկն ու չի կուտակվի ծակոտիների մեջ:

9. Նշի յուղ

Նշի յուղը հիանալի բնական միջոց է չոր մաշկը խոնավեցնելու, աչքերի տակի մուգ շրջանակներից ու այտուցներից ազատվելու և մանր կնճիռները հարթելու համար: Այն պարունակում է բազմաթիվ օգտակար նյութեր, ինչի շնորհիվ լավագույն միջոցն է ծերացող մաշկը խնամելու համար:

Նշի յուղը հարկավոր է օգտագործել պարբերաբար: Անհրաժեշտ է քնելուց առաջ այն մատների ծայրերով քսել մաշկին, այնուհետև թույլ հարվածելով տարածել: Յուղը քսելուց կես ժամ հետո խորհուրդ է տրվում մաքրել դրա մնացորդները բամբակյա սկավառակի միջոցով:

10. Ձիթապտղի յուղ

Ձիթապտղի յուղը շատ օգտակար է ոչ միայն սննդի մեջ օգտագործելու համար: Այն նաև հիանալի կոսմետիկ միջոց է, որը կօգնի ազատվել կնճիռներից, թարմացնել, խոնավեցնել ու սնուցել ծերացող մաշկը: Պարզապես հարկավոր է օրական 10 րոպե ձիթայուղով կոմպրես դնել մաշկին: