Սիրիայում հայ սակրավորներն ականներից ու չպայթած զինամթերքից մաքրել են տասնյակ հազարավոր քառակուսի մետր տարածք Սիրիայի մայրաքաղաք Դամասկոսի Դարայա արվարձանում:
Դամասկոսի մերձակայքում դեկտեմբերի 6-ին մեկնարկած աշխատանքներն ընթանում են ՄԱԿ-ի ականազերծման ծառայության (UNMAS) հովանու ներքո: Կառույցի Facebook-ի պաշտոնական էջից տեղեկանում ենք, որ աշխատանքների առաջին շաբաթվա ընթացքում «Հումանիտար ականազերծման և փորձագիտական կենտրոն» ՊՈԱԿ-ի երկու խմբեր ականներից մաքրել են մոտ 70 հազար քառակուսի մետր տարածք, ինչը հավասար է 10 ֆուտբոլային դաշտի:
Ընդհանուր առմամբ, անհրաժեշտ է ականազերծել Դարայա արվարձանի մոտ 2 միլիոն քառակուսի մետր գյուղատնտեսական նշանակություն ունեցող տարածքներ:
Հիշեցնենք, որ հայկական մարդասիրական առաքելությունը Սիրիայում է գտնվում 2019թ. փետրվարից։ Այդ ժամանակից ի վեր ականներից, ընդհանուր առմամբ, մաքրվել է շուրջ 950 հազար քառակուսի մետր տարածք, իսկ բժիշկները օգնություն են ցուցաբերել ավելի քան 42 հազար տեղացի բնակիչների:
.gif)
