Թուրքիայի քաղաքացիներն իրենց ազգային արժույթի՝ լիրայի փոխարժեքի անկումային տատանումների ու գնաճի պատճառով լիրայով արված իրենց խնայողությունները մեծ թափով վերածում են կրիպտոարժույթների: Այս մասին գրել է «Financial Times»-ը՝ ավելացնելով, որ կրիպտոարժույթների փոխակերպվող գումարի չափերի վերաբերյալ անհանգստություն է հայտնել Թուրքիայի Կենտրոնական բանկի նախագահ Շահափ Քավջըօղլուն օտարերկրյա ներդրողների հետ հանդիպման ժամանակ:
Ermenihaber-ի փոխանցմամբ՝ վկայակոչելով կրիպտոարժույթների վերաբերյալ «Chainalysis»-ի կազմած զեկույցը՝ «Financial Times»-ը նշում է, որ 2021-ին Թուրքիայի կրիպտոարժույթների շուկայում կատարված գործարքների ծավալները նախորդող տարվա համեմատ ավելացել են 15 անգամ: «CryptoCompare»-ի տվյալներով էլ վերջին 1 տարվա ընթացքում Թուրքիայում կատարված Bitcoin-ի գործարքներն աճել են 9 անգամ: Գործարքների ծավալով Թուրքիան առաջին տեղում է հայտնվել Մերձավոր Արևելքում:
Ուսումնասիրության մեջ նշվում է, որ Մերձավոր արևելքում շատերն իրենց խնայողություններն ազգային արժույթների արժեզրկումից ապահովագրելու համար վերածում են կրիպտոարժույթների: Այս միտումը կա նաև Աֆրիկայի ու Լատինական Ամերիկայի զարգացող շուկաներում:
Ուսումնասիրությունը ցույց է տվել, որ Թուրքիայի քաղաքացիները վերջին շրջանում ավելի շատ հակված են իրենց խնայողությունները փոխելու կայուն քոինների, որոնցից է «Tether»-ը: Վերջին 6 ամսում թուրքական լիրայով այս կրիպտոարժույթի գնումների ծավալներն ավելացել է 360 տոկոսով։
.gif)
