Գերմանիայի կանցլեր Օլաֆ Շոլցը հայտնել է, որ Բեռլինն ուսումնասիրում է Ուկրաինայի առանձին հարցումները զենքի մատակարարման առնչությամբ: «Արմենպրես»-ի հաղորդմամբ՝ «ՌԻԱ Նովոստի»-ն տեղեկացնում է, որ Գերմանիայի կանցլերն այս մասին ասել է Ուկրաինայի նախագահի հետ հանդիպմանը հաջորդած ճեպազրույցում: Նա ավելացրել է, որ վերլուծությունից հետո կհայտնի իր որոշման մասին:
«Դուք գիտեք զենքի արտահանման գերմանական օրենսդրությունը ճգնաժամային շրջանների վերաբերյալ: Ես նշել եմ, որ մենք արդեն մեծ օգնություն ենք ցուցաբերել: Ցանկանում եմ կրկնել՝ Գերմանիան ամենաշատ ֆինանսական օգնությունն է տրամադրում Ուկրաինային, և մենք կշարունակենք դա անել»,-ասել է Շոլցը:
Ուկրաինան վերջին շրջանում Գերմանիայից ակնկալում է զենքի մատակարարում: Գերմանիան հրաժարվում է տրամադրել՝ հղում կատարելով այն իրավական կարգավորումներին, որ կառավարությունն օրենքով չի կարող հավանության արժանացնել ճգնաժամային շրջաններին մահաբեր զենքի մատակարարումը:
.gif)
