Մարտի 13-ին Գյումրիի Մուշ-2 թաղամասում բնակարանային գողություն էին արել:
Դեպքի վայր մեկնած օպերատիվ-քննչական խմբերն ու փորձաքրեագետը ուսումնասիրեցին դեպքի վայրը՝ պարզելով՝ երբ, որտեղից և ինչպես է կատարվել գողությունը: Ժամը 12.30-ից ժամը 15-00-ն, օգտվելով տանտերերի բացակայությունից, տեխնիկական միջոցների գործադրմամբ պոկել էին ննջասենյակի պատուհանի ճաղավանդակը, մտել ներս ու զգեստապահարանից գողացել ոսկյա զարդեր:
Փաստի առթիվ հարուցվեց քրեական գործ:
Մուշի քրեական հետախույզները, համագործակցելով Շիրակի մարզային վարչության ծառայողների հետ, հաղորդումից օրեր անց տեղեկություններ ստացան, որ բնակարանային գողությունը հնարավոր է կատարած լինի Գյումրի քաղաքի Կարեն Դեմիրճյան փողոցի 38-ամյա մի բնակիչ:
Մարտի 23-ին նա հայտնաբերվեց, բերման ենթարկվեց ոստիկանության Մուշի բաժին և խոստովանեց արարքը:
Պարզվել է, որ 38-ամյա տղամարդը գողոնը վաճառել էր Երևան քաղաքի ոսկու շուկաներից մեկում՝ նախնական տվյալներով՝ 10 հազար դոլարով: Բերման ենթարկված տղամարդը ներկայացվել է նախաքննական մարմնին: Նա կալանավորվել է: Ձեռնարկվում են միջոցառումներ՝ գողոնը հայտնաբերելու ուղղությամբ:
Հանգամանքները նախաքննությամբ պարզվում են:
.gif)
