ՀՀ ֆուտբոլի ֆեդերացիայի նախագահ Ռուբեն Հայրապետյանը, անդրադառնալով «Հրազդան» մարզադաշտում իրականացվելիք շինարարությանը, Հանրային հեռուստատեսության եթերից ասել է. «Էդ մարզադաշտը ոչ մեկի սեփականությունը չի, դա երկրի, ժողովրդի սեփականությունն ա: Ես արդեն հոգնել եմ, ազնվորեն եմ ասում, չեմ էլ ուզում… Ի՞նչ է մտածում ճարտարապետը, ի՞նչ են մտածում այն մարդիկ, ովքեր թույլատրել են: 10 տարի կռիվ եմ տվել, չեմ թողել` դա անեն: Բայց ինչքա՞ն կարելի է: Մարդիկ 2 hատ մանկապատանեկան թիմ ստեղծեցին, ու մանկապատանեկան դպրոց ա ստեղծել, 3-4 տարի առաջ ֆուտբոլի դպրոցի կարգավիճակը փոխել ա ու հիմա գնացել ա, ինչ-որ շինարարություն ա սարքել: …Ինձ ո՞վ է երաշխիք տալու, որ երբ ես վերանորոգեմ, կառուցեմ, հետո այդ մարզադաշտում սեղան չեն դնելու, լուսատախտակի վրա էլ կենացներ չեն ասելու»: Հայրապետյանին հակադարձել է «Հրազդան» մարզադաշտի վարձակալ, ԱԺ ՀՀԿ-ական պատգամավոր Աշոտ Աղաբաբյանը` slaq.am-ին ասելով. «Եթե վարձակալը ես եմ, «Հրազդան» ստադիոնը սեփականացրել եմ, հո դա մեքենա չի, որ տանեմ, գարաժը կանգնեցնեմ: Մենք ընդամենը ղեկավարում ենք ստադիոնը, ստադիոնն էլ ժողովրդինն ա, ինչքան էլ սեփականացնենք, գույք չի էլի, որ վերցնես, տանես հետդ տուն»: Ինչպես երեւում է երկու ՀՀԿ-ական հեղինակությունների հեռակա բանավեճից, «այս խմորը դեռ շատ ջուր կվերցնի»: «Ժողովուրդ»-ի կողմից հավելենք, որ Աշոտ Աղաբաբյանն իսկապես հաճախ է իր սիրելի Լեւոն Սարգսյանի` Ալրաղացի Լյովիկի հետ հայրենի շոու բիզնեսի աստղերի ուղեկցությամբ «Հրազդան»-ի հենց կենտրոնում քեֆ անում` վառելով մարզադաշտի լույսերը, որոնք, ի դեպ, բավականին շատ էկեկտրաէներգիա են խլում` մինչեւ մի քանի հազար ԱՄՆ դոլար: Բայց Աշոտ Աղաբաբյանը փողի խնդիր չունի:
.gif)
