Այսօր հանրապետականները նիստ կանցկացնեն

Իշխող Հանրապետական կուսակցությունը ուրբաթ երեկոյան ամենայն

հավանականությամբ կհրավիրի գործադիր մարմնի նիստ: Այս մասին ”Ազատություն” ռադիոկայանին տված հարցազրույցում տեղեկացրեց

Հանրապետականի խորհրդի անդամ, Ազգային ժողովի պատգամավոր Հովհաննես Սահակյանը: Սահակյանն

ասաց` լուրջ քաղաքական խնդիրներ պետք չէ փնտրել այն բանում, որ նիստը տեղի չունեցավ

հինգշաբթի օրը, ինչի մասին ասուլիսում հայտարարել էր հանրապետական պատգամավորը: Նրա

խոսքով, ամենայն հավանականությամբ, պատճառը Հանրապետական կուսակցության գործադիր մարմնի

անդամ, ԱԺ նախագահ Հովիկ Աբրահամյանի բացակայությունն էր:

”Դա իմ անձնական կարծիքն է. Հովիկ Աբրահամյանը Եվրախորհրդի

խորհրդարանների նախագահների հավաքն էր եւ որպես ԱԺ նախագահ մասնակցում էր այդ կարեւոր

միջոցառմանը: Նիստը հետաձգվեց մեկ օրով, եւ այսօր կարող է տեղի ունենալ այդ նիստը,

որեւէ խնդիր չկա», – ասաց հանրապետական պատգամավորը:

Իսկ թե արդյո՞ք Հանրապետականի գործադիր

մարմնի նիստում կքննարկվի ”Բարգավաճ Հայաստան”-ի` կոալիցիայից դուրս գալու հարցը, Հովհաննես Սահակյանն

ասաց, թե ինքը տեղյակ չէ, քանի որ գործադիր մարմնի անդամ չէ եւ օրակարգին տեղյակ չէ:

Հարցին, թե արդյո՞ք ճիշտ են խոսակցություններն

այն մասին, որ ՀՀԿ-ն ԲՀԿ-ի առջեւ ուլտիմատում է դրել, այսինքն Գագիկ Ծառուկյանը կամ

պետք է հայտարարի, որ սատարում է Սերժ Սարգսյանի թեկնածությունը 2013-ի նախագահական

ընտրություններում, կամ հակառակ դեպքում պետք է դուրս գա կոալիցիայից, Հովհաննես Սահակյանն

ասաց, թե  իրենք ուլիտմատում դնելու խնդիր չունեն,

քանի որ Հանրապետականը այսօր իբրեւ քաղաքական ուժ իր կազմակերպվածության առումով շատ

ավելի առաջ է, քան նախորդ ընտրություններից առաջ:

”Խնդիր չկա, որպեսզի պայման դրվի: Ես կարծում եմ, որ մենք

մտավախություն չունենք որեւէ առումով, որ 2013 կամ 2012 թվականի ընտրություններում

մենք կարող ենք որոշակի խոչընդոտներ ունենալ այս կամ այն քաղաքական ուժի պատճառով,

եւ դրանից ելնելով պետք է պայման դնենք”, – ասաց Սահակյանը:

Ի պատասխան այն հարցին, թե ՀՀԿ-ն

կտուժի՞, եթե ԲՀԿ-ն դուրս գա կոալիցիայից, Սահակյանն ասաց. – ”Բայց Հանրապետականը ”Բարգավաճ”-ով չէ ուժեղ, եկեք փաստենք` մենք առանձին քաղաքական ուժ

ենք, ԲՀԿ-ն էլ առանձին քաղաքական ուժ է, եւ չեմ կարծում, որ Հանրապետական կուսակցության

այսօրվա ուժեղությունը  պայմանավորված է նաեւ

ԲՀԿ-ով”: