Կառավարությունը հավանություն տվեց Հայաստանի Հանրապետության եւ Վերակառուցման եւ զարգացման միջազգային բանկի միջեւ «Կրթության բարելավման ծրագրի լրացուցիչ ֆինանսավորում» վարկային համաձայնագրի (22 մլն 600 հազար եվրո) ստորագրման առաջարկությանը: ԿԳՄՍ նախարար Վահրամ Դումանյանի խոսքով՝ «Կրթության բարելավում» վարկային ծրագիրը Համաշխարհային բանկի աջակցությամբ մեկնարկել է 2015 թվականին:
«Ծրագրի շրջանակներում ստեղծվել են 136 նախակրթարաններ, որոնցում ընդգրկված են 4-6 տարեկան 13 580 երեխաներ, հիմնանորոգվել է 13 ավագ դպրոց, 107 ավագ դպրոցներ համալրվել են բնագիտական առարկաների 335 լաբորատորիաներով: 585 դպրոց վերազինվել է համակարգչային տեխնիկայով: Դրանց միջոցով կազմակերպվել են հեռավար ուսուցման սենյակներ գյուղական այն դպրոցներում, որտեղ ուսուցչի պակաս կա. այժմ 53 նման դպրոցներում մենթոր դպրոցների ուսուցիչները էլեկտրոնային եղանակով դասավանդում են այդ առարկաները: Ավելի քան 4000 ուսուցիչ եւ վարչական աշխատող վերապատրաստվել են ուսումնական գործընթացում տեղեկատվական գործիքների կիրառման ուղղությամբ, վերանայվել են հանրակրթության 6 ուսումնական ոլորտների առարկայական չափորոշիչները եւ ծրագրերը»,- ասաց Դումանյանը` հավելելով, որ 15 բուհի տրամադրվել են դրամաշնորհներ, որոնց արդյունքում բուհերում ստեղծվել են նորարարական գիտահետազոտական կենտրոններ:
Հաշվի առնելով վերջնարդյունքները՝ Դումանյանը նշեց, որ կառավարությունը դիմել է Համաշխարհային բանկին ծրագրի հետագա շարունակականությունն ապահովելու համար լրացուցիչ ֆինանսավորում տրամադրելու հարցով:
«Նոր ծրագրով 80 բնակավայրում կստեղծվեն մատչելի նախադպրոցական կրթական ծառայություններ, որոնցում ներգրավված կլինեն 4-6 տարեկան շուրջ 3 հազար երեխա, կհիմնանորոգվեն, կկահավորվեն եւ կվերազինվեն 74 ավագ դպրոցներ՝ շինարարական եւ անվտանգության չափանիշներին համապատասխան: 200 հանրակրթական դպրոցների կտրամադրվեն բնագիտական եւ ինժեներական 5-ական լաբորատորիաներ, կիրականացվեն կրթության կառավարման տեղեկատվական համակարգի կիրառության, գործընթացների հետագա թվայնացման, տվյալների վիզուալիզացիայի նոր հնարավորությունների ներդրման աշխատանքներ, կշարունակվի բուհերում նորարարական գիտահետազոտական կենտրոնների ստեղծումը: Ծրագրի արդյունքում նախատեսվում է իրականացնել 5 նոր դրամաշնորհային ծրագիր. նախատեսվող ծրագրի ընդհանուր գումարը կկազմի 28,25 մլն եվրո, այդ թվում՝ վարկային միջոցներից 22,6 մլն եվրո, իսկ պետբյուջեի միջոցներից՝ 5,65 մլն եվրո»,- ասաց Դումանյանը: Նախարարի խոսքով՝ նիստին չզեկուցվող հարցերից մեկն էլ առնչվում է Կառավարության կողմից նախադպրոցական ծառայությունների ընդլայնման քաղաքականությանը. կառավարությունը հողամաս է նվիրաբերում Լոռու մարզի Սպիտակ համայնքին, որպեսզի Լուսաղբյուրում կառուցվի 144 տեղանոց մոդուլային մանկապարտեզ:
Ն. Պ.
.gif)
