«Ժողովուրդ» օրաթերթը գրում է. Ոստիկանության աշխատակիցները, որոնք ապրիլի 17-ից, ըստ էության, աշխատում են արտակարգ ռեժիմով, հավելավճար չեն ստանալու: Համենայնդեպս, այդ է վկայում «Ժողովուրդ» օրաթերթին տրված Ոստիկանության պատասխանը: Պատասխանում ասվում է. «Ոստիկանության ծառայողներին արտաժամյա, գիշերային ժամերին, հանգստյան և տոն օրերին ծառայության համար հավելումներ չեն տրվում»: Իսկ որպես հիմք նշվում է «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» ՀՀ օրենքի 8-րդ հոդվածի 3-րդ մասը:
Ոստիկանությանն ուղղված հարցման միջոցով ցանկանում էինք պարզել, թե ընդդիմության ակցիաների ժամանակ ոստիկանների այդպիսի մեծ ներգրավվածությունը որքան է արժենում պետբյուջեի վրա: Ոստիկանության պատասխանը ներկայացնում ենք ստորև. «Ընթացիկ տարվա մայիսի 1-ից 15-ը ընկած ժամանակահատվածում տեղի ունեցող զանգվածային միջոցառումների ընթացքում հասարակական կարգի պահպանության և հասարակական անվտանգության ապահովման նպատակով ոստիկանության ստորաբաժանումների կողմից իրականացվող ուժեղացված ծառայությանը հիմնականում ուղղակիորեն վերագրվում են սննդի ապահովման, հեղուկ վառելիքի և տրանսպորտային միջոցների վարձակալության ծախսերը։ Ըստ այդմ, նշված ժամանակահատվածում արտաքին ծառայության մեջ ներգրավված զինծառայողների սննդի ապահովման ծախսերը կազմել են 20,9 մլն. դրամ, հեղուկ վառելիքի գծով՝ 10,1 մլն. դրամ և տրանսպորտային միջոցների վարձակալության համար՝ 21,7 մլն. դրամ»։
Մանրամասները՝ «Ժողովուրդ» օրաթերթի այսօրվա համարում