Կարող են լինել նոր ցնցումներ. ԱԻՆ-ը կոչ է անում

Ինչպես հայտնի է, այսօր՝ հուլիսի 11-ին, Վրաստան-Հայաստան սահմանային գոտում՝ Բավրա գյուղից ոչ հեռու, տեղի է ունեցել M=4.4 մագնիտուդով երկրաշարժ, որի ուժգնությունն էպիկենտրոնային գոտում կազմել է 6 բալ:

Այս սեյսմիկ ցնցմանը նախորդել են ԱԻՆ Սեյսմիկ պաշտպանության տարածքային ծառայության սեյսմիկ համալիր մոնիթորինգի դիտացանցի տվյալների անոմալ դրսևորումներ, որոնք բնութագրում են երկրակեղևի լարվածադեֆորմացիոն վիճակը և որոնք կուտակվել են ՀՀ տարածքի հյուսիս-արևմտյան հատվածում՝ Բավրա գյուղի շրջակայքում: Մեծ է հավանականությունը, որ տարբեր պարամետրերի անոմալ դրսևորումները ռեալիզացվել են նշված երկրաշարժի և նրա բազմաթիվ հետցնցումների ձևով:

ՀՀ արտակարգ իրավիճակների նախարարությունը հայտնում է, որ, հիմնվելով այն տեղեկատվության վրա, որ վերը նշված անոմալ դրսևորումների քանակը ՀՀ տարածքում ընդհանուր առմամբ նվազել է, իսկ անոմալիաների ինտենսիվությունը՝ թուլացել, նաև այն փաստի վրա, որ վերը նշված M=4.4 մագնիտուդով երկրաշարժին հետևած բոլոր ցնցումներն այս պահի դրությամբ ավելի թույլ են, քան նշված ցնցումը, ենթադրում ենք, որ տեղի է ունենում երկրակեղևում կուտակված լարումների աստիճանական թուլացում: Սա էլ նշանակում է, որ անհանգստանալու և առավել ևս խուճապի մատնվելու հիմքեր չկան:

Ըստ ԱԻՆ-ի՝ հաշվի առնելով M=4.4 երկրաշարժի ուժը՝ կարող են լինել նոր ցնցումներ, որոնց մի մասը կզգա բնակչությունը:

Հիշեցնենք՝ այսօր՝ տեղական ժամանակով ժամը 07:36-ին, ՀՀ տարածքում գրանցվել էր առաջին երկրաշարժը, որի ցնցման ուժգնությունը կազմել էր 6 բալ:

Այս ցնցումից քիչ հետո՝ ժամը 09:10-ին, գրանցվել էր 5 բալ ուժգնությամբ ևս մեկ երկրաշարժ, որից մեկ ժամ անց՝ ժամը 10:14-ին, գրանցվել էր երրորդ երկրաշարժը, որի էպիկենտրոնային գոտում ստորգետնյա ցնցման ուժգնությունը կազմել է 3-4 բալ: