«Տեսալսողական մեդիայի մասին» օրենքում կրկին փոփոխություններ կանեն. նոր նախագիծ

Բարձր տեխնոլոգիական արդյունաբերության նախարարությունը հանդես է եկել օրենսդրական նախաձեռնությամբ, որով առաջարկում է փոփոխություններ կատարել «Տեսալսողական մեդիայի մասին» օրենքում:

Նշենք, որ այս օրենքը ՀՀ Ազգային ժողովի կողմից ընդունվել է 2020 թվականի հուլիսի 16-ին, սակայն նախագծի հիմնավորման մեջ նշվում է, որ կիրառման ընթացքում ի հայտ են եկել բազմաթիվ անճշտություններ և բացթողումներ, որոնք վերացնելու անհրաժեշտությամբ պայմանավորված Հայաստանի Հանրապետության բարձր տեխնոլոգիական արդյունաբերության նախարարությունը նախաձեռնել է օրենքում փոփոխություններ և լրացումներ կատարելու գործընթաց:

Այսպիսով,  նախագծով առաջարկվում է օրենքում կատարել հետևյալ փոփոխությունները և լրացումները․

Սահմանվել են «ռադիոհաճախականություն», «պաշտոնական հաղորդագրություն», «ապակոդավորման միջոց» հասկացությունները, վերանայվել և խմբագրվել են «Ցանցային օպերատոր», «Տեսալսողական ծրագրերի դիստրիբյուտոր» և «էթիկայի կանոնագիր» հասկացությունները:

Հստակեցվել է տեսալսողական հաղորդումներում արգելված կոչեր տարածելու պահանջը:

Վերանայվել է հեղինակային իրավունքի պաշտպանության համար դիմում ներկայացնելու, ինչպես նաև Հեռարձակողների և օպերատորների կողմից Կարգավորող պետական մարմնին ներկայացվող հասույթի չափի մասին տեղեկատվության պայմանները:

Խմբագրվել է Հանրային հեռարձակողի խորհրդի  անդամների նշանակման կարգը, Խորհրդի անդամների նշանակման և վճարովի աշխատանքից ազատվելու պայմանի նպատակով հստակեցվել է գիտական, կրթական կամ ստեղծագործական աշխատանքի սահմանումը:

Խմբագրվել է հանրային մուլտիպլեքսում ներառված տեսալսողական ծրագրերը ցանցային օպերատորներին տարածման իրավունքով անվճար տրամադրման պայմանը:

Ավելացվել է նոր պահանջ՝ հանրային մուլտիպլեքսի սլոթի օգտագործման լիցենզավորման մրցույթին մասնակցելու հայտի և ցանցային օպերատորի գործունեության լիցենզավորման դիմումի ներկայացմանը:

Վերանայվել է ցանցային օպերատորի կողմից իր ցանցում վերահաղորդվող տեսալսողական ծրագրերի կամ դրանց փոփոխության մասին տեղեկատվությունը Կարգավորող պետական մարմնին ներկայացնելու պահանջը:
Վերանայվել է լիցենզավորման վավերապայմանները,

Վերանայվել է տեսալսողական ծրագրերի դիստրիբյուտորի գործունեությանը ներկայացվող պահանջները,

Վերանայվել է հեղինակազորման կամ լիցենզիայի գործողության կասեցման և դադարեցման պայմանը:
Իրականացվել են նաև մի շարք այլ խմբագրական բնույթի փոփոխություններ և լրացումներ:

Ն.Հ.