ՏԵՍԱՆՅՈՒԹ. Նախկին նախարարի դատավոր որդին դատի է տվել Կոռուպցիայի կանխարգելման հանձնաժողովին. ինչն է պատճառը

Հակակոռուպցիոն դատարանի դատավոր չդարձած անձինք դիմել են դատարան: ArmLur.am-ին հայտնի դարձավ, որ Սարգիս Երիցյանը դիմել է ՀՀ վարչական դատարան պահանջելով, որ դատարանը Կոռուպցիայի կանխարգելման հանձնաժողովի Թիվ 152-03-2022 բարեվարքության եզրակացությունն անվավեր ճանաչի: Նշենք, որ դատավոր Երցյանը ՀՀ կրթության և գիտության նախկին նախարար, Սերգո Երիցյանի որդին է:

Հավելենք, որ նա Հակակոռուպցիոն դատարանում դատավոր աշխատելու դիմում չի ներկայացրել և նրա հայցը ընդդեմ Կոռուպցիայի կանխարգելման հանձնաժողովի կապված է միայն նրա մասով Կոռուպցիայի կանխարգելման հանձնաժողովի կողմից տրված եզրակացության հետ:

«Ժողովուրդ» օրաթերթը գրել էր, որ դատավորները դուրս են եկել ՀՀ Կոռուպցիայի կանխարգելման հանձնաժողովի դեմ, քանի որ, ըստ նրանց, հանձնաժողովը սեւ գիծ է քաշում իրենց մասնագիտական առաջխաղացման եւ կարիերայի վրա։ «Ժողովուրդ» օրաթերթը տեղեկացավ, որ Բարձրագույն դատական խորհուրդը 2022թ. օգոստոսի 5-ին որոշում էր կայացրել 10 դատավորի հանել առաջխաղացման եւ հակակոռուպցիոն մասնագիտացման թեկնածուների ցանկից՝ պատճառաբանելով, որ Հանրապետության նախագահը հուլիսի 22-ին եւ օգոստոսի 1-ին գրություններով առարկություններ է ներկայացրել: Իսկ ովքե՞ր էին զրկվել Հակակոռուպցիոն դատարանում աշխատելու հնարավորությունից։ Նրանք Կարեն Գրիգորյանը եւ Ռիմա Առաքելյանն էին, որոնց անունները հանվել են հակակոռուպցիոն մասնագիտացման բաժնի կոռուպցիոն հանցագործությունների քննության ենթաբաժնից: Ինչպես նաեւ՝ դատավոր Նաիրա Ավետիսյանը եւ Սյուզաննա Վարդանյանը, որոնց անուններն էլ հանվել են հակակոռուպցիոն քաղաքացիական գործերի քննության ենթաբաժնից:

Իսկ ինչո՞ւ էր նախագահը դեմ եղել, որ այս դատավորները կարողանային իրենց ցանկալի դատարանում դատավոր նշանակվել կամ աշխատել։ Բանն այն է, որ Հակակոռուպցիոն դատարանում աշխատելու համար կոռուպցիայի կանխարգելման հանձնաժողովը դատավորների բարեվարքության մասով կարծիք է հայտնում։ Վերոնշյալ դատավորների մասով հանձնաժողովը բացասական կարծիք է հայտնել որոշ դեպքերում, ըստ ցուցակում ներկայացվածների, ոչ պրոֆեսիոնալիզմի դրսեւորման արդյունքում, եւ այդ կարծիքի հիման վրա նախագահը մերժել էր բավարարել այս դատավորների՝ Հակակառուպցիոն դատարանում դատավոր նշանակելու դիմումները: Ու այժմ դատավորները ահազանգում են, որ չեն լռելու եւ դատի են տալու հանձնաժողովին, քանի որ այն օբյեկտիվորեն չի քննել, ավելին՝ իրենց կարիերայի վրա սեւ գիծ է քաշել»:

Քնար Մանուկյան