Եվրամիությունը հրապարակել է հակառուսական պատժամիջոցների նոր` 8-րդ փաթեթը, որը հրապարակվել է ԵՄ պաշտոնական կայքում։
«Նոր փաթեթն արձագանքում է Ռուսաստանի կողմից շարունակական էսկալացիային և անօրինական պատերազմին ընդդեմ Ուկրաինայի, այդ թվում՝ ուկրաինական տարածքի ապօրինի բռնակցմանը՝ հիմնվելով կեղծ «հանրաքվեների» վրա, լրացուցիչ զորքերի հավաքագրմանը և բացահայտ միջուկային սպառնալիքներին», – նշված է հաղորդագրությունում։
Պատժամիջոցները ներառում են տնտեսական սահմանափակումներ և անձնական սահմանափակումներ: Մասնավորապես, նոր փաթեթը նախատեսում է արգելել ռուսական նավթի ծովային փոխադրումները երրորդ երկրներ՝ սահմանված գնի շեմից բարձր արժեքով։ Նախատեսվում է, որ նավթի գների սահմանաչափը կներդրվի դեկտեմբերի 5-ից, իսկ նավթամթերքի համար՝ 2023 թվականի փետրվարի 5-ից։
Ընդլայնվում է նաև Ռուսաստանից պողպատե արտադրանքի, տրանսպորտային միջոցների, փայտի, թղթի, կոսմետիկայի, ոսկերչական իրերի, մեքենաների, քիմիական նյութերի, պլաստիկի և ծխախոտի արտահանման և ներմուծման արգելքը։
Փաթեթը ներառում է 7 միլիարդ եվրոյի ներմուծման արգելք, որի նպատակն է կրճատել Ռուսաստանի եկամուտները։
Բացի դրանից, սահմանափակող միջոցները նախատեսում են արգելել ԵՄ երկրների քաղաքացիներին ղեկավար պաշտոններ զբաղեցնել որոշ ռուսական պետական ընկերություններում։
.gif)
