Այսօր Հայ մամուլի հիմնադրման օրն է: Այս օրվա առթիվ առավոտից շնորհավորական ուղերձներ են հնչում:
ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Թագուհւ Թովմասյանը գրում է.
«Ուշադրություն չդարձնել թերթերին՝ դա նույնն է, ինչ քնով անցնել անդունդի եզրին:
ՀՀ վարչապետ Նիկոլ Փաշինյանը գրում է. ««Հայ մամուլի հարգելի ներկայացուցիչներ,
Սիրելի գործընկերներ,
Ջերմորեն շնորհավորում եմ ձեզ մասնագիտական տոնի՝ Հայ մամուլի օրվա կապակցությամբ: Այս տոնը կոչված է մեկ անգամ ևս արժևորելու և նշանավորելու ազատ խոսքի դերն ու կշիռը մեր հասարակության տարբեր շերտերում: Մամուլը, խոսքի ազատությունը ժողովրդավարության ամենակարևոր ինստիտուտներից են, որոնց զարգացման գործում մեր կառավարությունը հետևողական է և շարունակելու է ամեն ինչ անել, որպեսզի մեր երկիրը շարունակի քայլել ժողովրդավարության ճանապարհով:
Այս օրերին, երբ ազգովի բազմաթիվ մարտահրավերների առաջ ենք կանգնում, դրանց հաղթահարման ճանապարհին հայ մամուլը կարևոր անելիք ունի, քանի որ մամուլի առանցքային դերերից է առողջ մտածելակերպով կայուն հասարակության ձևավորումը, տարբեր ոլորտներում թափանցիկության ապահովումն ու իրականության պատշաճ իրազեկումը: Մամուլի ազատությունն այն կարևորագույն արժեքներից է, որն ունենք Հայաստանում, և մենք պետք է ամեն ինչ անենք, որպեսզի պահպանենք և զարգացնենք այն:
Սիրելի լրագրողներ,
Զանգվածային լրատվամիջոցների ներկայացուցիչներ,
Ձեր բարդ և պատասխանատու աշխատանքում մաղթում եմ արդյունավետ գործունեություն, ստեղծագործական վերելքներ, մշտապես կատարելագործվելու կամք և ձգտում»:
Հայաստանի Ժուռնալիստների Միության տարածած հայտարարությունում ասվում է. «Սիրելի՛ գործընկերներ, մամուլի հարգարժան ներկայացուցիչներ, այսօր նշում ենք Հայ մամուլի հիմնադրման օրը:
«Մենք՝ գործող լրագրողներս, ամենօրյա աշխատանքով շարունակում ենք հայ մամուլի ավանդույթները, ինչը ոչ միայն հպարտության առարկա է, այլ նաև չափազանց պարտավորեցնող առաքելություն:
Այսօր մեր պետությունը բախվում է լրջագույն մարտահրավերների, պայմանավորված` ինչպես արտաքին, գոյաբանական սպառնալիքներով, այնպես էլ ժողովրդավարությանն ուղղված ներքին ոտնձգություններով, ազատ խոսքի հանդեպ դրսևորվող՝ երբեմն թշնամանքի հասնող անհանդուրժողականությամբ: Բոլոր այս իրողությունները բազմապատիկ բարդացնում են մամուլի, զանգվածային լրատվության միջոցների աշխատանքը: Մյուս կողմից, սակայն, նաև մեր մասնագիտական գործունեությանն ուղղված այդ մարտահրավերները ստիպում են մեր աշխատանքին վերաբերվել ոչ միայն ծայրահեղ պատասխանատվությամբ, այլ նաև նույնքան պատվախնդրությամբ՝ մեր մասնագիտությունը ամենատարբեր ոտնձգություններից պաշտպանելու իմաստով:
Հարգելի գործընկերներ,
Այսօր հայկական մամուլի դեմ ուղղված ամենահամակարգային մարտահրավերներից մեկն այն է, որ գործող իշխանությունները՝ արտաքին աշխարհի համար ձևական ժողովրդավարություն ցուցադրելու նպատակով պահպանում են խոսքի ու մամուլի ազատության արտաքին շղարշը, միևնույն ժամանակ բովանդակային հարթությունում անելով ամեն ինչ` ազատ խոսքը սահմանափակելու, ԶԼՄ-ների աշխատանքը բարդացնելու համար: Այս մարտահրավերներին դիմակայելու համար մեզանից պահանջվում է առաջին հերթին ու առավելապես մասնագիտական համերաշխություն, յուրատեսակ հավատարմություն լրագրությանը, որը մեզ կհամախմբի անկախ մեր բոլոր տարբերություններից ու տարաձայնություններից: Այդ միասնականությանը մենք կարող ենք հասնել այդ թվում ու առաջին հերթին մեր գործունեության մեջ լրագրողական էթիկայի կանոնների խստիվ պահպանմամբ և մեր աշխատանքի հանդեպ ներքին պատասխանատվության բարձրացմամբ, ինչը, ցավոք, ոչ միշտ է դրսևորվում մեր օրերում:
Ազատ խոսքն ու մամուլը ժողովրդավարության կենսական հիմնասյուներից մեկն է, որի պաշտպանությունն ու զարգացումն այսօր մեր՝ լրագրողներիս պարտականությունն է:
Շնորհավորելով բոլորիս Հայ մամուլի օրվա առիթով՝ Հայաստանի ժուռնալիստների միությունը բոլորիս մաղթում է կամք, վճռականություն, մասնագիտական ու մարդկային քաջություն՝ այս դժվարին ժամանակներում մեզ բաժին հասած մասնագիտական, բայց նաև հանրային պարտականությունը արժանապատվորեն կատարելու գործում»:
.gif)
