ՏԵՍԱՆՅՈՒԹ. Պարեկներին տեսնելով՝ պայուսակը նետել է ընկերոջ ուղղությամբ, նա էլ՝ նետել է թփերի մեջ

Հոկտեմբերի լույս 28-ի գիշերը պարեկային ծառայության Երևանի գնդի 4-րդ գումարտակի 2-րդ վաշտի ոստիկաններն ապօրինի հրազեն են հայտնաբերել։ Նրանք ժամը 4.10-ի սահմաններում Նոր Նորքի Թևոսյան փողոցում ստուգման նպատակով մոտեցել են երկու երիտասարդի։ Երիտասարդները հայտնել են իրենց անունները, ապա Վարդան ներկայացած անձը մոտի պայուսակը նետել է ընկերոջ ուղղությամբ, նա էլ՝ նետել է թփերի մեջ։ Այնուհետև երիտասարդները փախել են։

Պարեկներին հաջողվել է մեկին բռնել ու ձերբակալել, իսկ մյուսը շարունակել է փախուստը։

Նրա արտաքինի վերաբերյալ կողմնորոշումներ են փոխանցվել Նոր Նորքում ծառայություն իրականացնող այլ կարգախմբերի, որոնք էլ կարճ ժամանակում հայտնաբերել ու ձերբակալել են։ Դեպքի վայրի զննությամբ հայտնաբերվել է ատրճանակ՝ լիցքավորված փամփուշտներով։ Ձերբակալվածները տեղափոխվել են ոստիկանության Նոր Նորքի բաժին, որտեղ պարզվել է նրանց ինքնությունը. Երևանի բնակիչ են՝ 24 և 19 տարեկան։

Կրտսերի խուզարկությամբ հայտնաբերվել է գաղտնի փականով դանակ: Նրանք ներկայացվել են տարածքային քննչական մարմնին։ Կատարվում է նախաքննություն: