Աշտարակի բաժնի քրեական հետախույզները բացահայտել են ապօրինի թմրաշրջանառության հերթական դեպքը:
Ոստիկանությունից հայտնում են, որ նոյեմբերի 25-ին Արագածոտնի մարզի Սասունիկ համայնքում ձերբակալել և բաժին են տեղափոխել նույն համայնքի մի բնակչի: 31-ամյա տղամարդու խուզարկությամբ հայտնաբերվեցին մոխրացված հետքերով ապակե կաթուցիչ և պոլիէթիլենային փաթեթ:
Փաթեթում մարիխուանայի նմանվող զանգված էր: Ձերբակալվածի հայտնածով՝ կաթուցիչում և փաթեթում մարիխուանա է: Հայտնաբերվածն առգրավվել է: Կատարվում է նախաքննություն:
Աշտարակի բաժնի ոստիկանների օպերատիվ աշխատանքի շնորհիվ թարմ հետքերով բացահայտվեց Աշտարակում կատարված ևս մի հանցավոր արարք:
Նոյեմբերի 24-ին բաժնում հաղորդում էր ստացվել: Ղազարավան համայնքի բնակիչը հայտնում էր, որ նախորդ օրը անհայտ անձը կամ անձինք կոտրել էին իր տան մոտ կայանված «ՎԱԶ-2106» մակնիշի ավտոմեքենայի դռան կողային ապակիները և փորձել հրկիզել այն:
Դեպքի վայր մեկնած Աշտարակի ոստիկանները պարզեցին, որ Ղազարավանում բնակվող երկու երիտասարդ՝ 17 և 18 տարեկան, անձնական խնդիրներ էին ունեցել տուժողի հետ և փորձել էին հրկիզել նրա մեքենան՝ դյուրավառ նյութ լցնելով վրան: Չկարողանալով հասնել արդյունքի՝ հեռացել էին: Ժամեր անց նրանցից մեկը հայտնաբերվեց ու ձերբակալվեց: Ձեռնարկվում են միջոցառումներ՝ հանցագործության մյուս մասնակցին հայտնաբերելու ուղղությամբ:
Դեպքի առթիվ Արագածոտնի մարզային քննչական վարչությունում նախաձեռնվել է քրեական վարույթ: Հանգամանքները նախաքննությամբ պարզվում են:
.gif)
