Անշարժ գույքի սիրահարը. ով է ՀՀ նորանշանակ փոխվարչապետը

ՀՀ ֆինանսների նախկին նախարար Տիգրան Խաչատրյանը երեկ ՀՀ նախագահի հրամանով նշանակվեց ՀՀ փոխվարչապետ: Տիգրան Խաչատրյանն այս կառավարության այն եզակի պաշտոնյաներից է, որ բարձր պետական պաշտոններ է զբաղեցրել նաեւ նախկին իշխանությունների օրոք:

Այսպիսով, ով է ՀՀ նորանշանակ փոխվարչապետը

Նա իր գործունեությունը սկսել է 1995 թվականից՝ ՀՀ Էկոնոմիկայի նախարարության առաջատար մասնագետից, ապա տարբեր պաշտոններ է զբաղեցրել ֆինանսների, էկոնոմիկայի նախարարություններում: Իսկ, ահա, 2006-2016 թթ.՝ շուրջ 10 տարի, Խաչատրյանը սոլիդ պաշտոն էր զբաղեցնում հանրությանը հայտնի «Վալլեքս»-ում. նա հիշյալ ընկերությունների խմբի ֆինանսական տնօրենն էր:  ՀՀ տնտեսական զարգացման և ներդրումների նախարարի տեղակալից հետո զբաղեցրել է նախարարի, ապա Էկոնոմիկայի եւ Ֆինանսների նախարարների պաշտոնները եւ այժմ էլ ՀՀ փոխվարչապետն է:

ArmLur.am-ը ներկայացնում է նաեւ Տիգրան Խաչատրյանի՝ 2020 թվականի ներկայացրած հայատարարագիրը։

Նախարարը Երեւանի կենտրոնում ունի մեկ բնակարան, երկու հողամաս՝ մեկը Կոտայքի մարզի Ջրվեժում, մյուսը՝ Տավուշի մարզի Դիլիջանում, մեկ ամառանոց՝ Շենգավիթում, մեկ ավտոտնակ ու անհատական բնակելի մեկ տուն՝ Ջրվեժում։ Ի դեպ, Խաչատրյանը բնակարանը գնել է 2016 թվականին, երբ զբաղեցնում էր ՀՀ տնտեսական զարգացման և ներդրումների նախարարի տեղակալի պաշտոնը։

Ավտոմեքենա չունի։ Համենանյդեպս, այդպես նշված է իր հայտարարագրում, իսկ պաշտոնը ստանձնելու հայտարարագիր դեռ չի ներկայացրել Խաչատրյանը, որպեսզի պարզենք՝ ունի՞, թե՞ ոչ։ Նշենք, որ նախարարն ունի 28 հազար 100 դոլարի չափով պարտատոմսեր ունի, իսկ հանձնած ավանդերը կազմել են 15000 դոլար։ Բանկային հաշիվները կազմել են 206 դոլար, 350.000 դրամ , իսկ կանխիկ դրամը՝ 18.000 դոլար։

Տիգրան Խաչատրյանի նախորդ տարվա եկամուտը, բացի ստացած փոխություններից, 13 մլն 222 հազար դրամ աշխատավարձն է, որը նա ստացել է, երբ էկոնոմիկայի նախարար էր։ Բացի այս, տրված փոխառություններից ստացած տոկոսը կազմել է 517.000 դրամ, եւ 554 դոլար։ Ստացված փոխառությունը 825 000 դրամ։

Ն.Հ.