Ժ. ԱՆԴՐԵԱՍՅԱՆԻ ՇՐՋԱԲԵՐԱԿԱՆԻ ՀԵՏՔԵՐՈՎ

Կրթության, գիտության, մշակույթի ու սպորտի նորանշանակ նախարար Ժաննա Անդրեասյանի՝ դեռեւս փոխնախարար եղած ժամանակ Երեւանի քաղաքապետարանին ու ՀՀ մարզպետարաններին հասցեագրված շրջաբերականը, որ «Ժողովուրդ» օրաթերթի ձեռքում էր հայտնվել, բավականին մեծ աղմուկ է առաջացրել: Հիշեցնենք, որ, այդ շրջաբերականի համաձայն, դպրոցներում հետայսու կարող է արգելվել ռազմահայրենասիրական բոլոր տեսակի խմբակների գործունեությունը, քանի որ, ըստ ԿԳՄՍ-ի՝ մարզպետարանների գլխավոր քարտուղարներին ու Երեւանի փողքաղաքապետին ուղարկված շրջաբերականի, «դպրոցները պետք է խուսափեն ռազմական օգտագործումից»:

Տիկին Անդրեասյանի անմիջական հրահանգով՝ նախարարության լրատավական ծառայությունը գերատեսչությանը պաշտպանող հրապարակմամբ էր հանդես եկել՝ փորձելով հերքել, թե նման շրջաբերական է եղել: Նախարարությունը, սակայն, դա արել է մանիպուլատիվ երանգով. «Ժաննա Անդրեասյանի՝ նախարարի պաշտոնում նշանակվելուց հետո «Անվտանգ դպրոցներ» միջազգային հռչակագրի վերաբերյալ որեւէ շրջաբերական գրություն ՀՀ հանրակրթական դպրոցներին չի ուղարկվել»: «Ժողովուրդ» օրաթերթը չի էլ գրել, թե վերոնշյալ շրջաբերականը հանրակրթական դպրոցներին է ուղարկվել, այլ նշել էինք՝ մարզպետարաններին, ավելի կոնկրետ՝ մարզպետարանների գլխավոր քարտուղարներին է հասցեագրվել:

«Հայ ասպետ» կրթադաստիարակչական հիմնադրամի տնօրեն Կարին Տոնոյանը «Ժողովուրդ» օրաթերթի հետ զրույցում հաստատեց, որ նախարարության կողմից տարածված, այսպես ասած, «պարզաբանումը» ոչ այլ ինչ է, քան աղմուկից հետո իրավիճակը մեղամցնելու փորձ: Ինչ վերաբերում է դպրոցներում ռազմահայրենասիրական դաստիարակության հետ կապված հարցերին, ապա, Տոնոյանի խոսքով, «Հայ ասպետ» դպրոցի դահլիճում բարձր դասարանի երեխաներն անցնում են մարտական պատրաստություն: «Եվ եթե հազար նախարար էլ փոխվի, մենք դա անելու ենք: Ես դա հրապարակավ էլ, առանց վախենալու ասում եմ: Մենք նամակ էինք ստացել նախարարությունից, որ դպրոցների դահլիճներն այսուհետ չեն տրվելու նման խմբերի: Դուք գիտեք, որ դպրոցների մարզադահլիճները վարձում են այդ խմբերն ու մարզումներ անցկացնում, քանի որ այլ տեղ հնարավոր չէ նման բան կազմակերպել, մանավանդ՝ ձմռանը: Մեզ նման պատերազմող երկրի համար այդպիսի խմբակները ու բանակային կյանքի նախապատրաստելը կարեւոր է: Չտիրապետել այդ ամենին հանցագործություն է: Ես պարտադրում եմ իմ սաներին տիրապետել ռազմական, զինորական այդ հմտություններին, քանի որ նրանք ավարտում ու գնում են բանակ, որ գոնե ինչ-որ կերպ պատրաստված լինեն… Գոնե տարրական բաներ չիմանա՞ն: Ավելին ասեմ՝ պետականորեն պետք է կազմակերպել եւ պարտադրել, որ երեխաները սովորեն, հմտանան»,- նշում է Տոնոյանը: Նախարարության առաջ բերած այն դիտարկմանը, թե «ուսումնական հաստատության թիրախավորման վտանգը բարձրանում է, երբ դրա տարածքում տեղակայվում է ռազմական բնույթի կառույց», մեր զրուցակիցն արձագանքում է. «Կչկչան հավի տեղը առաջինն են իմանում, իսկ դուք (նախարարությանը նկատի ունի- հեղ.) ինչո՞ւ եք կչկչում, որ մեր թշնամին էլ իմանա, թե դպրոցների դահլիճներն ինչի համար են օգտագործում»: Իսկ որպեսզի նման թյուրըմբռնում չլիներ, ապա, Կարին Տոնոյանի համոզմամբ, նախարարը պետք է հրավիրեր դպրոցի տնօրեններին ու խորհրդակցեր նրանց հետ: «Հարգելի՛ նախարար, որ Դուք ոչ կոմպետենտ եք, մենք բոլորս գիտենք, որ իշխանություններն արհեստասվարժ չեն, դա էլ գիտենք: Կանչեիք, ասեիք՝ ինչպե՞ս անենք, որ նաեւ այս աղմուկը չբարձրանար: Բայց իրականությունը այն է, որ նրանք իրենց տերերին ցանկանում են ցույց տալ, որ մենք ապառազմականացնում ենք հասարակությանը, եւ մեզ պատրաստում են «խաղաղության պայմանագրի»: Նրանք ուզում են ցույց տալ, որ այլեւս երբեք զինված ատամ ցույց չենք տալու: Իհարկե, աղմուկից հետո նրանք փորձել են մեղմացնել իրավիճակը»,- ամփոփում է մեր զրուցակիցը:

ՍԵՎԱԿ ՎԱՐԴՈՒՄՅԱՆ

ՆԿԱՏՈՂՈՒԹՅՈՒՆ

ՀՀ գլխավոր դատախազ Աննա Վարդապետյանի՝ դեկտեմբերի 19-ի հրամանով՝ Գորիսի կայազորի զինվորական դատախազությունում (նախկինում՝ Մալաթիա-Սեբաստիա վարչական շրջանի դատախազություն) ինքնավար պաշտոն զբաղեցնող անձի նկատմամբ նշանակվել է «նկատողություն» տեսակի կարգապահական տույժ:

Այս մասին տեղեկացնում է Գլխավոր դատախազության հանրային կապերի բաժինը։

Կարգապահական վարույթի շրջանակում հաստատվել է, որ Գորիսի կայազորի զինվորական դատախազության դատախազը (նախկինում՝ Մալաթիա-Սեբաստիա վարչական շրջանի դատախազության դատախազ), առանց հարգելի պատճառի, պարբերաբար բացակայել է դատական նիստերից, իսկ իր մասնակցությամբ առաջին դատական նիստին ներկայացել է առանց գործի նյութերին ծանոթանալու, ինչի պատճառով դատական նիստը հետաձգվել է:

ՆԱՄԱԿՈՎ Է ԴԻՄԵԼ

ԱՄՆ կոնգրեսական Ֆրենկ Փելոնն իր գործընկերների հետ համատեղ նամակով դիմել է նախագահ Ջո Բայդենին՝ կոչ անելով ապահովել Արցախի ժողովրդի անվտանգությունը:

«Գործընկերներիս հետ միասին նամակ եմ հղել նախագահին՝ կոչ անելով գործողություններ ձեռնարկել՝ ապահովելու Արցախի ժողովրդի անվտանգությունն այն բանից հետո, ինչ Ադրբեջանն արգելափակել է Լաչինի միջանցքը՝ Լեռնային Ղարաբաղը Հայաստանին կապող միակ ճանապարհը՝ վտանգելով հազարավոր մարդկանց»,- գրել է Փելոնը:

ՊԱՇՏՈՆԻ ՓՈՓՈԽՈՒԹՅՈՒՆ

Տեղի է ունեցել Երեւանի քաղաքապետարանի հերթական գործակարգավարական խորհրդակցությունը։

Մինչ գործակարգավարականին անցնելը Երեւանի քաղաքապետ Հրաչյա Սարգսյանը ներկայացրեց Մալաթիա-Սեբաստիա վարչական շրջանի նոր ղեկավարին։

Շրջանի նոր թաղապետ է նշանակվել Արման Բարխուդարյանը։ Նշենք, որ Արման Բարխուդարյանը մինչ այս զբաղեցնում էր ԱԺ փոխնախագահ Ռուբեն Ռուբինյանի խոհրդականի պաշտոնը:

ԱԺ ՆԱԽԱԳԱՀԸ

ՀՀ Ազգային ժողովի նախագահ Ալեն Սիմոնյանը Շվեդիայի Ռիկստագի բարեկամական խմբի եւ ԵԽԽՎ-ում Շվեդիայի պատվիրակության որոշ անդամների կողմից  ի պատասխան նամակ է ստացել, որտեղ հասցեական դատապարտվել է ադրբեջանցիների կողմից Լաչինի միջանցքը փակելու հանգամանքը, որը բերել է մարդկային աղետի. այս մասին ArmLur.am-ի հետ զրույցում նշեց ՀՀ ԱԺ նախագահի մամուլի խոսնակ Ծովինար Խաչատրյանը: Մասնավորապես, վերջինիցս հետաքրքրվել ենք, թե, որպես ՀՀ ԱԺ նախագահ, այս օրերին ինչ է արել Ալեն Սիմոնյանը, ինչ բանակցությունների է մասնակից եղել:

Ի պատասխան՝ Ծովինար Խաչատրյանն ասաց, թե նույնանման բովանդակությամբ նամակներ են ուղարկվել տարբեր երկրների խորհրդարանների ղեկավարներին: «Բոլոր միջազգային գործընկերներին ուղարկվել է նույն բովանդակությամբ տեքստեր: Նամակներ ուղարկելուց հետո նաեւ հասցեական պատասխաններ ենք ստանում: Բացի Շվեդիայից, արձագանքներ են եղել նաեւ այլ երկրների խորհրդարաններից, ճշտող զանգեր ենք ստացել եւ այժմ էլ դեռ արձագանքներ ենք սպասում»,- նշեց նա: Ծովինար Խաչատրյանն ընդգծեց՝ ելնելով իր պաշտոնի առանձնահատկությունից՝ Ալեն Սիմոնյանն անձամբ բանակցություններ չի վարում, սակայն այս օրերին աշխատում է միջազգային ասպարեզում:

ԹՌՉՆԱՖԱԲՐԻԿԱՅԻ ՏՆՕՐԵՆԻՑ՝ ՆԱԽԱՐԱՐ

Երեկ հայտնի դարձավ, որ Հայաստանը ֆինանսների նախարարությունը նոր ղեկավար կունենա: Խոսքը նախորդ տարվա օգոստոսին նախարարի տեղակալ նշանակված Վահե Հովհաննիսյանի մասին է: Վահե Հովհաննիսյանը ծնվել է 1980 թվականին Երեւանում, ավարտել է Երեւանի պետական համալսարանի տնտեսագիտության ֆակուլտետը, ծառայել է ՀՀ զինված ուժերում, ունի հինգ երեխա:

Տեղեկացնենք, որ Հովհաննիսյանն իր աշխատանքային փորձը սկսել է 1999-2000 ականներից, երբ աշխատել է որպես «Հայներարտբանկ» ընկերության կառավարչական հաշվապահության վարչության մասնագետ, ապա զբաղեցրել է «Լուսակաթ» թռչնաբուծական ֆաբրիկայի ֆինանսական բաժնի ղեկավարի պաշտոնը: Թռչնաֆաբրիկայում Հովհաննիսյանը մեկ տարի է աշխատել: Արդյոք Հովհաննիսյանը, պետական համակարգում նորեկ լինելով, կկարողանա ղեկավարել Հայաստանի ֆինանսների ոլորտը՝ ցույց կտա ժամանակը: Բացի այս, նորանշանակ նախարարը աշխատել է նաեւ «Ալֆա փլաս», «Օրանժ Արմենիա» ընկերություններում: Նա նաեւ փորձագետ աշխատել է Ասիական զարգացման բանկում: 2020-2021 թվականներին բազմազավակ Հովհաննիսյանը զբաղեցրել է Ասիական զարգացման բանկի տնօրենի խորհրդականի պաշտոնը: 2018-2019 թվականներին Հովհաննսիյանը վարչապետի խորհրդականն է եղել՝ հասարակական հիմունքներով: