Խելացի, օրինակելի տղա, համեստ. հրդեհի հետևանքով կյանքից զրկված Տարոն Ղարիբյանը փետրվարին կզորացրվեր

Խելացի, օրինակելի տղա, լավ ընկեր, բարեկամասեր, համեստ. այսպես են բնութագրում Ազատ գյուղի զորամասի ողբերգական հրդեհի հետևանքով այսօր զոհված զինծառայող Տարոն Ղարիբյանին:

Տարոբ Ղարիբյանն Արարատի մարզի Ուրցաձոր գյուղից էր: Ուրցաձորի նախկին գյուղապետ Ռաֆիկ Անդրեասյանը ArmLur.am-ին պատմում է, որ Տարոնը դպրոցն ավարտելուց հետո զորակոչվել է բանակ: Արդեն մեկ ամսից պետք է զորացրվեր. «Գյուղատնտեսական աշխատանքով էր զբաղվում: Ծնողասեր էր շատ ու ընկերասեր, պարկեշտ տղա էր: Ծնողներն էլ խելոք մարդիկ էին, իրենց հող ու ջրով ապրող: Տարոնենք երեք եղբայր էին, ինքն ամենափոքրն էր, պետք է մեկ ամսից զորացրված»,-պատմում է Ռաֆիկ Անդրեասյանը:

Հիշեցնենք, հունվարի 19-ին՝ ժամը 01:30-ի սահմաններում, դեռևս չպարզված հանգամանքներում հրդեհ է բռնկվել Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում:

Նախնական տվյալներով բռնկված հրդեհի հետևանքով զոհվել է 15 զինծառայող, ունենք 7 վիրավոր, 3 զինծառայողի վիճակը գնահատվում է ծանր:

Քրիստինա Մուշեղյան