ԼՈՒՐ ԿԱԴՐ            

Լուսանկարն արվել է  Արարատ քաղաքի ճանապարհին

Ահա այսպիսի տեսարանի կարելի է ականատես լինել մարտի 8-ին։ Ի՞նչ իմանանք, գուցե ներսում անակնկալներ են։

ՀԱՍԱՐԱԿՈՒԹՅՈՒՆ

ՀԱՐՑ. Ի՞նչ տուգանք է սահմանված աշխատողների, նրանց վճարվող աշխատանքի վարձատրությանն ուղղված միջոցների մասին տեղեկությունը չներկայացնելու դեպքում, եթե գործատուն սոցիալական վճարներ չի կատարում:             

 Հովհաննես Հունանյան (50 տարեկան)

ՊԱՏԱՍԽԱՆ. Քաղաքացու հարցին ի պատասխան` տեղեկացնում ենք, որ «Պարտադիր սոցիալական ապահովության վճարների մասին» ՀՀ օրենքի 6-րդ հոդվածի 4-րդ մասի, ինչպես նաեւ ՀՀ ԿԱ ՀՊԾ պետի` 30 մայիսի 2005թ. ««Պարտադիր սոցիալական ապահովության վճարների հաշվարկման եւ վճարման կարգի մասին» հրահանգը հաստատելու մասին» հրամանի հաստատված հրահանգի 23-րդ կետի դրույթներով` եթե օրենքներով եւ ՀՀ միջազգային պայմանագրերով սոցիալական վճարները հաշվարկելու եւ պետական բյուջե փոխանցելու պարտականությունը դրված է վարձու աշխատողների վրա, այս դեպքում գործատուն պարտավոր է մինչեւ եռամսյակին հաջորդող ամսվա 20-ը (ներառյալ) հարկային մարմին վերը նշված հրահանգի հավելված 2-ով սահմանված ձեւով տեղեկություններ հայտնել վարձու աշխատողների, նրանց վճարվող աշխատանքի վարձատրությանն ուղղված միջոցների եւ դրանց հավասարեցված եկամուտների մասին:

Այդ պահանջը խախտելու համար գործատուն վճարում է տուգանք՝ լիազորված մարմին չներկայացրած յուրաքանչյուր տեղեկության համար 25.000 դրամի չափով:

ՀՀ պետական եկամուտների կոմիտե

«ԺՈՂՈՎՈՒՐԴ». Նշենք, որ աշխատողի՝ աշխատանքի ընդունումը ՀՀ օրենսդրությամբ սահմանված կարգով գրավոր չձեւակերպելու (այսինքն` աշխատանքի ընդունման մասին գրավոր հրամանի եւ գրավոր պայմանագրի բացակայության) փաստը ՀՀ կառավարության սահմանած կարգով արձանագրելու դեպքում գործատուն տվյալ ամսում յուրաքանչյուր չձեւակերպված աշխատողի համար հաշվարկում եւ վճարում է պարտադիր սոցիալական ապահովության վճար` 150.000 դրամի չափով, եթե չձեւակերպված վարձու աշխատողների թվաքանակը չորսից վեց է:

ՍՈՑԻԱԼԱԿԱՆ

ՀԱՐՑ. Եթե քաղաքացին ունի հաշմանդամության կարգ եւ էպիկրիզով մոտենում է հիվանդանոց, այդ դեպքում ի՞նչ բժշկական օգնություններից կարող է օգտվել նա: Առանձին-առանձին խնդրում եմ գրել՝ որ կարգի դեպքում որ բուժօգնությունից կարող է օգտվել:

 Հենրիկ Աբովյան (70 տարեկան)

ՊԱՏԱՍԽԱՆ. Քաղաքացու հարցին ի պատասխան` տեղեկացնում ենք,  որ հաշմանդամություն ունեցող անձինք ունեն հետեւյալ իրավունքներն ու արտոնությունները.

1. ընդգրկված են ՀՀ կառավարության՝ 04.03.2004 թ. «Պետության կողմից երաշխավորված անվճար եւ արտոնյալ պայմաններով բժշկական օգնության եւ սպասարկման մասին» թիվ 318-Ն որոշման հավելված 1-ով հաստատված բնակչության սոցիալապես անապահով ու առանձին (հատուկ) խմբերի ցանկում եւ կարող են օգտվել սահմանված՝ անվճար եւ արտոնյալ պայմաններով բժշկական օգնություն եւ սպասարկում ստանալու արտոնություններից:
2. Ընդգրկված են ՀՀ կառավարության՝ 30.05.2019 թ. N642-Ն որոշմամբ հաստատված անվճար եւ արտոնյալ պայմաններով դեղեր ձեռք բերելու իրավունք ունեցող բնակչության սոցիալական խմբերի ցանկում, օգտվում են անվճար դեղեր ձեռք բերելու արտոնությունից:     3-րդ խմբի հաշմանդամություն ուեցող անձինք կարող են օգտվել անվճար դեղեր ձեռք բերելու արտոնությունից՝ 50% զեղչով, եթե չեն օգտվում ավելի արտոնյալ պայմաններով դեղորայք ստանալու իրավունքից («Հաշմանդամների սոցիալական պաշտպանության մասին» ՀՀ օրենքի հոդված 11-ի դրույթներով սահմանված):
3. Հաշմանդամություն ունեցող անձի վերականգնողական անհատական ծրագրի (ՎԱԾ) կամ ծառայությունների անհատական ծրագրի (ԾԱԾ) հիման վրա աջակցող միջոցներ /պրոթեզներ, օրթեզներ, հենակներ, սայլակներ, քայլակներ, լսողական սարքեր, ձայնաստեղծ սարքեր, աչքի պրոթեզներ եւ այլն/ ստանալու իրավունք՝ համաձայն ՀՀ կառավարության 2015 թվականի   սեպտեմբերի 10-ի N 1035-Ն որոշման։

 ՀՀ աշխատանքի եւ սոցիալական հարցերի նախարարություն

«ԺՈՂՈՎՈՒՐԴ». Իսկ ավելի մանրամասն բժշկական մասնագիտական տեղեկատվություն ստանալու համար դիմումատուն կարող է դիմել ՀՀ առողջապահության նախարարություն։