«Պոստ սկրիպտում» մեդիա հոլդինգի սեփականատեր, Չարենցավանի ավագանու անդամ Վանիկ Էլիզբարյանը «Ժողովուրդ»-ի հետ զրույցում ասաց, որ մամուլի ակումբ ունենալն այսօր եկամտաբեր բիզնես չէ:
-Դե մենք նոր ակումբ ենք` 3-4 ամսվա պատմություն ունենք, բայց կարծում եմ, մենք մեր տեղը գտել ենք: Վստահություն ենք ներշնչել լրագրողական դաշտում` բանախոսների առումով: Այն, ինչ ուզում էի, դրա մոտ 60-70 տոկոսն այսօր արդեն կա:
-Եթե մամուլի ակումբ ունենալը եկամտաբեր չէ, այդ դեպքում ո՞րն էր այն բացելու նպատակը:
-Այսօր մեծ թափով զարգանում են ինտերնետ կայքերը, այսինքն` հինը փոխարինվում է նորով: Մամուլի ակումբ ունենալով` ես նպատակ եմ ունեցել, որ այն ոչ միայն ասուլիսների անցկացման տաղավար լինի: Առաջիկայում վերապատրաստման դասընթացներ կկազմակերպենք, կլինեն նաեւ քննարկումներ, հավաքներ, որտեղ հանդես կգանք հայտարարություններով:
-Դուք կարծես հիմնականում ընդդիմության հետ չեք աշխատում: Շատ քիչ դեպքերում կարելի է Ձեր ակումբում ընդդիմության ներկայացուցիչների տեսնել: Ինչո՞ւ:
-Ես, ընդդիմություն ասելով, չեմ հասկանում միայն ՀԱԿ, մենք շատ լավ հարաբերությունների մեջ ենք «Ժառանգության», ՀՅԴ-ի հետ: Մենք նորմալ աշխատում ենք բոլորի հետ` մեզ մոտ խտրականություն չկա, թե ով ում թիմից է, ում ընկերն է կամ բարեկամը: Կարող եմ մի պարզ բան էլ ասել, եւ դա բոլորը կարող են փաստել, որ ինչքան լրագրողներն են մեր ակումբին հարազատ, այնքան մեզ` բանախոսները: Մեզ մոտ հյուր է եղել Սասուն Միքայելյանը` ընդդիմությունից: Պարզապես ՀԱԿ-ի հետ աշխատել չի լինում, երեւի ՀԱԿ-ը լրատվամիջոցների նկատմամբ հատուկ մոտեցում ունի: Կամ էլ, ինձ թվում է, վախենալու բան ունի, գուցե վստահության խնդի՞ր ունի:
Ես ոչ մի խտրականություն չեմ դնում, չեմ ասում` ում կանչե՛ք եւ ում մի՛ կանչեք: Կա մի անձնավորություն իմ կյանքում` ինքը բարձր պաշտոնյա է, իր հետ անձնական, թշնամական խնդիր ունեմ, ես ասել եմ, որ միայն էդ մի անձին մի՛ կանչեք:
-Դուք ԲՀԿ անդամ եք, արդյո՞ք այս ակումբը չի ծառայում ԲՀԿ-ական շահերի պաշտպանությանն ու քարոզչությանը:
-ԲՀԿ հիմնադրման օրվանից ես կուսակցության անդամ եմ, այսօր արդեն քաղխորհրդի անդամ: Իսկ մեր ակումբը ստեղծված է բոլորի համար, կարող եք հարցնել բոլոր բանախոսներին, ովքեր մեզ մոտ ասուլիս են տվել: Ես ի սկզբանե փորձել եմ այնպես անել, որ իմ կուսակցական լինելը չանդրադառնա ակումբի գործունեության վրա. դա իմ անձնական բիզնեսն է: Ես ոչ մի տեղից ճնշում չեմ ստացել: Մենք աշխատում ենք օբյեկտիվ, անկողմնակալ եւ անաչառ:
-Դուք նաեւ Չարենցավանի ավագանու անդամ եք: Ձեր գնահատմամբ` Չարենցավանի քաղաքապետն ինչպե՞ս է ղեկավարում քաղաքը:
-Լինելով Չարենցավան համայնքի ավագանու անդամ, լինելով այն մարդու զավակը, որը եղել է այդ քաղաքի առաջին բնակիչներից մեկը` ես շատ ցավով եմ նայում Չարենցավանի ներկային ու ապագային. անցյալը շատ գեղեցիկ էր: Չարենցավանը խոշոր արդյունաբերական քաղաք էր, իսկ այսօր գործարանների 90 տոկոսը գրեթե չի աշխատում: Այսօր այնտեղ աշխատատեղ չկա, եւ քաղաքը կորցրել է իր նախկին նշանակությունը: Ինչ վերաբերում է գործող քաղաքապետին, ապա իմ պատկերացրած քաղաքապետը պետք է ուժեղ ու հզոր լինի: Եթե քաղաքը մաքրվում է` աղբահանությունն արվում է, տանիքները վերանորոգվում են, դա դեռ չի նշանակում, որ էդ քաղաքապետը լավն է: Կուզենայի, որ Չարենցավանի վաղվա քաղաքապետը շատ ուժեղ լիներ, կարողանար իր ասելիքը բարձրացնել ցանկացած վայրում: Ու կարեւորը` գոնե փորձեր մոտ 20 տոկոսով նվազեցնել գործազուրկների թիվը: Թող չթվա, թե ես իրեն կողմնակից չեմ, պարզապես ես կուզեի, որ Չարենցավանի քաղաքապետը հզոր լիներ:
-Իսկ քաղաքական հավակնություններ չունե՞ք, ինչպես մի քանի մամուլի ակումբի ղեկավարներ:
-Ես ԲՀԿ քաղխորհրդի անդամ եմ եւ հաստատ ակտիվ եմ լինելու, չեմ կարող ասել` կմասնակցե՞մ ԱԺ ընտրություններին, թե՞ ոչ: Ինչ որոշում կայացնի կուսակցության ղեկավար մարմինը, այդ կերպ կփորձեմ շարժվել: Մեծամասնականով բացառում եմ, համամասնականով չեմ կարող ոչինչ ասել, իսկ Չարենցավանի քաղաքապետի ընտրությունների մասին դեռ չեմ ուզում ասել, պատրաստվում եմ:
.gif)
