Ապրիլի 4-ին կայացավ «Հարսանեկան Ping Pong» ներկայացման պրեմիերան: Սեր, դավաճանություն, սկանդալներ ու մի մեծ խառնաշփոթ, որի ականատեսը կարող եք այսուհետ դառնալ Հակոբ Պարոնյանի անվան երաժշտական կոմեդիայի պետական թատրոնում։
Ներկայացումը մի քանի պիեսներից ամբողջացրած պատմություն է, որը թարգմանել եւ ադապտացրել է Բաբկեն Չոբանյանը։ Կատակերգության պրոդյուսերները Արման Միտոյանն ու Տիգրան Վիրաբյանն են։
Վերջիններս վաղուց են համագործակցում եւ կարողանում են իրենց շուրջ համախմբել տաղանդավոր ստեղծագործողների:
«Ներկայացման մտահաղացումը ծնվել էր Տիգրան Վիրաբյանի մոտ։ Սցենարի ընտրությունը փոքր-ինչ երկար տեւեց՝ մոտ երկու տարի, եւ երբ որոշումը կայացվեց, ռեժիսոր Արշո Հարությունյանն անցավ գործի։ Դերասանական կազմն ի սկզբանե ընտրված էր։ Միշտ ցանկացել ենք գտնել այն գործը, որը համահունչ կլիներ այս կազմին»,-նշում է Արման Միտոյանը։
Ներկայացման մեջ խաղում են դերասաններ Լեւոն Հախվերդյանը, Գոռ Հակոբյանը, Իննա Խոջամիրյանը, Անի Խաչիկյանը, Մանե Մխոյանը:
«Իմ սիրած դերասաններն են բեմադրության մեջ զբաղված: Փորձերի ընթացքում հասկացանք, որ ստեղծագործական խումբը կամաց-կամաց վերածվում է լավ ընտանիքի, եւ այսօր կարողացան ապացուցել, որ սիրում են, գնահատում են իրենց աշխատանքը: Հանդիսատեսի բուռն արձագանքն ապացուցեց, որ չենք սխալվել պիեսի, դերասանների ընտրության հարցում», -լրագրողների հետ զրույցում ասաց պրոդյուսերներից Տիգրան Վիրաբյանը, որը նաեւ մտահղացման հեղինակն է: Պրոդյուսերը վստահ է՝ ներկայացումը երկար կյանք կունենա: Արդեն շրջագայելու առաջարկներ են ստացել: Հայտնի են նաեւ ներկայացման բեմում լինելու առաջիկա օրերը՝ ապրիլի 25, մայիսի 2 եւ մայիսի 12:
ԼԻԴԱ ԵՂԻԱԶԱՐՅԱՆ
ՄԱՐԶԻԿԸ ՑՆՑԵԼ Է ՀԱՄԱՑԱՆՑԸ
Պրոֆեսիոնալ բոդիբիլդերն իր մկանոտ մեջքով խենթացրել է համացանցը։ Ռալուկա Ռադուկուն բոդիբիլդինգի ամենահայտնի անուններից է։
Ռումինացի մարզիկը երկար ճանապարհ է անցել IFBB պրոֆեսիոնալ դառնալու համար: Նա մասնակցել է այնպիսի մրցույթների, ինչպիսիք են Bigman Pro-ն, Europa Pro-ն եւ Muscle Fest Romania Pro-ն: Նրա անհավանական սխրանքն ու կազմվածքը, անշուշտ, գրավել են շատերի ուշադրությունը:
Վերջերս բոդիբիլդերն իր Instagram-ում ցուցադրել է իր մեջքը։ Ակնհայտ է, որ Ռադուկուն կարող է լրջորեն մրցել բազմաթիվ փորձառու բոդիբիլդերների հետ: Այնուամենայնիվ, ինչպես եւ կանխատեսվում էր, նրա կազմվածքը գրավել է երկրպագուների ուշադրությունը։ Նրանք բազում մեկնաբանություններ են գրել՝ գնահատելով նրա քրտնաջան աշխատանքը:
«Շոուները շահում են թիկունքից»,- հրապարակմանը կից գրել է նա։ Կնոջ երկգլուխ մկանները հսկայական տեսք ունեն եւ համաչափ էին նրա մեջքին:
Հատկանշական է, որ սպորտի նկատմամբ նրա կիրքը եւ նրա անողոք քրտնաջան աշխատանքը ստեղծել են Raduku-ի առցանց երկրպագուների մեծ տիրույթ:
Նա ունի ավելի քան 36 հազար հետեւորդ, որոնք երբեք առիթը բաց չեն թողնում՝ հաճոյախոսելու նրա զարմանալի լուսանկարները:
ՉԵՆ ՍՏԱՑԵԼ ԱԶԳԱՅԻՆ ԱՐՏՈՆԱԳԻՐ
«Լեռնային Արցախ» եւ «Գանձասար» ակումբները չեն ստացել ազգային արտոնագիր եւ չեն կարողանա մասնակցել Պրեմիեր լիգայի հաջորդ մրցաշրջանին, եթե բողոքարկումը չբավարարվի։
Տեղի է ունեցել ՀՖՖ ակումբների արտոնագրման կոմիտեի (1-ին ատյանի մարմնի) հերթական նիստը. հաղորդում է ՀՖՖ-ի կայքը:
Նիստի ընթացքում քննության էին դրվել Fastex Հայաստանի պրեմիեր լիգայի 2022/2023 թթ. մրցաշրջանի մասնակից 9 ակումբների՝ «Ալաշկերտ», «Փյունիկ», «Վան», «Ուրարտու», «Արարատ», «Նոա», «Արարատ-Արմենիա», «Շիրակ», «Լեռնային Արցախ», եւ ՀՀ առաջին խմբի 2022/2023 թթ. առաջնությունում հանդես եկող 2 ակումբների՝ «Գանձասար» եւ «Վեստ Արմենիա», արտոնագրային ոչ ֆինանսական չափանիշի փաստաթղթային փաթեթները, որոնցով նրանք դիմել էին Ազգային արտոնագիր ստանալու համար: Այդ արտոնագրերը նրանց իրավունք կընձեռեն մասնակցելու ամռանը մեկնարկող Fastex Հայաստանի պրեմիեր լիգայի 2023/2024 թթ. մրցաշրջանին:
Արտոնագրման կոմիտեն կայացրեց միաձայն որոշում, ըստ որի՝ Ազգային արտոնագրեր շնորհվեցին թեկնածու ակումբներից 9-ին՝ «Ալաշկերտ ՖԱ», «Փյունիկ ՖԱ», «Վան ՖԱ», «Ուրարտու ՖԱ», «Արարատ ՖԱ», «Նոա ՖԱ», «Արարատ-Արմենիա ՖԱ» «Շիրակ ՖԱ» եւ «ՖԱ Վեստ Արմենիա»:
Ազգային արտոնագրերի շնորհումից հետո ակումբները կմասնակցեն ՈՒԵՖԱ-ի արտոնագրային գործընթացին եւ կսկսեն նախապատրաստել իրենց ֆինանսական փաստաթղթային փաթեթները վերոնշյալ արտոնագիրը ստանալու համար:
Արտոնագրման կոմիտեն 6 կողմ եւ 1 ձեռնպահ քվեարկությամբ որոշեց մերժել «Լեռնային Արցախ ՖԱ» ՍՊԸ-ի ազգային արտոնագիրն առ այն, որ ակումբը չի բավարարել ՀՖՖ ակումբների արտոնագրման կանոնակարգի (2022թ. խմբագրություն) հոդված 17-ի եւ հոդված 39-ի պահանջները։
Կոմիտեն նաեւ 5 կողմ, 1 դեմ եւ 1 ձեռնպահ քվեարկությամբ որոշեց մերժել «Գանձասար ՖԱ» ՀԿ-ի ազգային արտոնագիրն առ այն, որ ակումբը չի բավարարել ՀՖՖ ակումբների արտոնագրման կանոնակարգի (2022թ. խմբագրություն) հոդված 17-ով եւ հոդված 39-ով սահմանված պահանջները:
«Գանձասար ՖԱ» ՀԿ-ի եւ «Լեռնային Արցախ ՖԱ» ՍՊԸ-ի արտոնագրման դիմումի մերժման արդյունքում վերոնշյալ ակումբների առաջին թիմերը հնարավորություն չեն ունենա մասնակցել Fastex Հայաստանի պրեմիեր լիգայի 2023/2024 թթ. մրցաշրջանին:
Ակումբներն իրավունք ունեն բողոքարկելու ՀՖՖ ակումբների արտոնագրման կոմիտեի (1-ին ատյանի մարմնի) կայացրած որոշումը աշխատանքային 5 (հինգ) օրվա ընթացքում` սահմանված ընթացակարգի համաձայն դիմելով ՀՖՖ ակումբների արտոնագրման բողոքարկման կոմիտե (Բողոքարկման մարմին):
.gif)
