ՆՈՐ ԲԱՑԱՀԱՅՏՈՒՄՆԵՐ՝ ԱՆԴՐԱՆԻԿ ՔՈՉԱՐՅԱՆԻ ՄԱՍԻՆ

«Ժողովուրդ» օրաթերթին է փոխանցվել թՏսՏր ԸՐՎպվՌՌ թերթում հրապարակված մի հոդված, որը վերաբերում է ԱԺ ՔՊ խմբակցության պատգամավոր Անդրանիկ Քոչարյանին: Հիշեցնենք, որ նա 1994-1996 թվականներին եղել է Սպիտակի երկրաշարժի հետեւանքով աղետի գոտու վերածված տարածաշրջանում Հայաստանի կառավարության արտակարգ լիազոր ներկայացուցիչը, եւ խայտառակ բացահայտումներ են արվում նրա գործունեոթւյան մասով: Հոդվածի մի մասի մեջբերումն անում ենք ուղիղ. «Այժմ մեր խմբագրության ունեցած տեղեկությունների մասին. քանի որ բավականին մանրամասն նկարագրել ենք Քոչարյանի գործելաոճը եւ գործելակերպը, այս անգամ անդրադառնանք նրա կենցաղին: Այս հարցը շատ կարեւոր է այն մարդու համար, ով ոչ միայն աշխատավարձ չի ստանում, այլեւ իր համար օտար անգամ տանիք չունի։

Խմբագրությունը հետաքրքրվել է, թե ինչպես է Քոչարյանն այս տարի ապրել Գյումրիում, եւ բավականին հետաքրքիր տեղեկություններ ստացել: Գյումրիում, ինչպես հայտնի է, գործում է «Վան» ռեստորանը։ Մոտակայքում (իսկ դա ոչ բոլորին է հայտնի) գտնվում է պանսիոնատը։ Շքեղ համալիրը ժամանակին կառուցվել է հատկապես պատվավոր հյուրերի ընդունելության համար։ Այստեղ գոնե մի քանի ժամ անցկացրած հայտնիների ցանկում է Անգլիայի «Երկաթե տիկինը»։ Նախկին ռեժիմի կուսակցական շեֆերը պարզապես չեն հաշվում։ Պանսիոնատը բաղկացած է երկհարկանի հյուրանոցային տիպի շենքից (վեց սենյակ) եւ չորս քոթեջներից։ Հարցրե՛ք Գյումրիում ցանկացածին, եւ նա կասի, որ այդ բոլոր ճոխություններն այժմ տիրապետում են ՀՀ կառավարության լիազոր ներկայացուցիչ Անդրանիկ Քոչարյանն ու նրա համախոհները։ Կարելի է, իհարկե, անմիջապես նկատել, որ Քոչարյանը, փաստորեն, ոչ մի նոր բան չի հորինել, այլ միայն հետեւել է հանրապետության ղեկավարության օրինակին, որն անձնական օգտագործման համար բավական պարկեշտ «Քուշ» է բռնել, բայց դա այլ խոսակցության թեմա է, որը, հուսով եմ, անպայման կկայանա: Առայժմ միայն պետք է փաստել, որ «ամառանոցային սինդրոմը» գոյություն ունի ոչ միայն մայրաքաղաքում:

Ինչպես հաջողվել է պարզել, ոչ մի փաստաթուղթ, որը կօրինականացնի Շիրակի նոր կառավարիչներին շքեղ բնակարաններում տեղավորելը՝ հանգստի եւ ժողովրդի բարօրության համար բոլոր հարմարավետ պայմաններով, չի եղել, չկա եւ, ամենայն հավանականությամբ, այլեւս երբեք չի լինի։ Նման փաստաթղթի առկայությունը ենթադրում է նաեւ վճարում քաղցր կյանքի համար, իսկ այդ նպատակով միջոցներ չկան ոչ մի բյուջեում։ Երեւանից անկոչ հյուրերին պահելու ծանր պարտականությունը գուցե դժկամությամբ, բայց ստիպված իրենց ուսերին են վերցրել Գյումրիում հայտնի մարդիկ՝ Համբարձում եւ Հակոբ Մխիթարյան եղբայրները։ Նրանցից առաջինը «Վան» համալիրի տնօրենն է, իսկ երկրորդը աշխատում է ռեստորանում։ Գյումրեցիները հյուրընկալ ժողովուրդ են։ Երբ Քոչարյանն ու թիմը բնակություն հաստատեցին պանսիոնատում, Մխիթարյան եղբայրներն անգամ իրենց պարտքն էին համարում հյուրասիրել մայրաքաղաքից եկածներին, բայց հետո պարզվեց, որ նրանք պարզապես պարտավոր են դա անել, ընդ որում՝ ծախսերը վճարել միայն ու միայն սեփական գրպանից։ Բանը հասել է նրան, որ Մխիթարյան եղբայրները վճարում են ոչ միայն ջրի, էլեկտրականության, այլ կոմունալ ծառայությունների համար, այլեւ իրենք են գնում օճառ, անձեռոցիկներ եւ, կներեք, զուգարանի թուղթ: Այնուամենայնիվ, այս ամենը կոպեկ է՝ այն բանի համեմատ, ինչ պետք է ծախսել հյուրերի սննդի վրա: Ամենահամեստ հաշվարկներով՝ Մխիթարյանները Քոչարյանի եւ թիմի երեքանգամյա սննդի վրա ծախսում են 20-25 հազար ռուսական ռուբլի։ Իսկ գները բարձրանում են… Ռուսական հայտնի ասացվածքը՝ «անկոչ հյուրը թաթարինից վատ է»:

Մխիթարյանները հիշել են այն բանից հետո, երբ նրանց երկու անգամ գրեթե ստիպել են 50 հոգու համար խնջույքներ կազմակերպել։ Առաջին անգամ բանակայիններին հյուրասիրեցին, երկրորդ անգամ՝ Կարսի նահանգապետին։ Ծախսերի ընդհանուր գումարը կազմում է 2 միլիոն 200 հազար ռուսական ռուբլի: Քոչարյանը փոխհատուցել է ընդամենը 500 հազար։ Եվս 3 միլիոն ծախսվել է պանսիոնատը ինքնավար էլեկտրասնուցմամբ ապահովելու համար. պարոն Քոչարյանը, ինչպես պարզվեց, տանել չի կարողանում խավարը։ Եվ նա հասարակ մարդկանցից չէ. առանց երկու հոգուց բաղկացած ծառայի, նա ոչ մի կերպ չի կարող մնալ, մանավանդ որ նրանց աշխատանքի համար ոչ մի լումա չի վճարում։ Կամա թե ակամա համաձայնելով բարձրաստիճան հյուրերի «ներդրողների» դերին՝ Մխիթարյան եղբայրները շուտով պարզեցին, որ վերջնականապես սնանկացել են։

Ինչ-որ եկամուտներ, իհարկե, կարող էր բերել ռեստորանը, բայց Երեւանից դեսանտի կողքին հաստատվելուց հետո գյումրեցիները կարծես սկսել էին խուսափել այդ վայրից, իսկ շուտով ընդհանրապես մոռացել էին «Վանի» գոյության մասին: Ոչ ոք, ի վերջո, չի ցանկանում ցույց տալ բարձր վերադասներին, որ նա փող ունի, հատկապես՝ օրինականացված պետական ռեկետի պայմաններում։ Իսկ Մխիթարյան եղբայրներն իսկապես սնանկացան։ Քաղաքում հայտնի որբ երեխաների բարերարներն այժմ ավտոմեքենա են վաճառում՝ պարտքերը մարելու համար։ Ավելի շուտ՝ ի ուրախություն նրանց, որովհետեւ Քոչարյանի եւ նրա թիմի պահպանման համար տարեսկզբից, ամենահամեստ հաշվարկներով, ծախսվել է 9 հազար դոլար, իսկ մեքենաներն այժմ շատ ավելի ցածր գնով են գնում»։

ՔՆԱՐ ՄԱՆՈՒԿՅԱՆ

ՆԻՍՏԸ ՀԵՏԱՁԳՎԵՑ

ՀՀ պետեկամուտների կոմիտեի նախկին նախագահ Գագիկ Խաչատրյանի վիճակը մայիսի 1-ին վատացել է, նրան տեղափոխել են հիվանդանոց եւ վիրահատել: Այս մասին դատարանում հայտնեց փաստաբան Երեմ Սարգսյանը: Արդյունքում դատական նիստը հետաձգվեց:

Ինչպես հայտնի է, հունվարի 18-ին Գագիկ Խաչատրյանին դատարանը թույլատրել էր մեկնել արտերկիր բուժման նպատակով։ Նա 2023 թվականի հունվարի 20-ից մինչեւ փետրվարի 10-ը բացակայել էր երկրից, եւ չնայած մեղադրող դատախազը դեմ էր՝ մտավախություն հայտնելով, որ Խաչատրյանը Հայաստան չի վերադառնա, այնուամենայնիվ, Խաչատրյանը գնաց եւ հետ եկավ:

Ինչպես հայտնի է, Գագիկ Խաչատրյանին մեղադրանք է առաջադրված միլիոնավոր դոլարների չարաշահման, կաշառք վերցնելու եւ փողերի լվացման համար։ Խոսքը 41 միլիոն դոլարի մասին է։ Գլխավոր դատախազությունը Խաչատրյանին մեղադրում է նաեւ ապօրինի ճանապարհով հարստանալու համար։ Գագիկ Խաչատրյանից եւ նրան փոխկապակցված 20-ից ավելի անձանցից բռնագանձման ենթակա է 210 անշարժ գույք, որից 60-ը՝ Երեւան քաղաքում:

Բացի այդ, դատախազությունը պահանջում է բռնագանձել 14 տրանսպորտային միջոց, մասնակցություն իրավաբանական անձ հանդիսացող 33 կազմակերպությունում, նաեւ ավելի քան 40 միլիարդ դրամ:

Ի՞ՆՉ ԿՏԱ ԱՅՆ

ArmLur.am-ը տեղեկացավ, որ փոփոխություններ կկատարվեն Հայաստանի Հանրապետության քաղաքացիական դատավարության օրենսգրքում: Հիմնավորման մեջ նշվում է, թե դատական համակարգում ներդրվելու է էլեկտրոնային համակարգ: Նախագծի ընդունումը հնարավորություն կընձեռի ստեղծել եւ ներդնել դատական միասնական էլեկտրոնային կառավարման համակարգ: Այն կապահովի քաղաքացիական գործերի մեկ ատյանի դատարանից մեկ այլ ատյանի դատարան եւ միեւնույն ատյանի դատարանի նստավայրերի միջեւ փոխանցումը, ինչպես նաեւ կողմ-կողմ, կողմ-դատարան ծանուցման արդյունավետ համակարգի գործարկումը: Այս ամենի արդյունքում հնարավոր կդառնա դատարան ապացույցներ ներկայացնելը, միջնորդություններ եւ դատավարական այլ գործողություններ կատարելն էլեկտրոնային եղանակով։

Նշվում է, թե ներկայումս առկա գործիքները բավարար չեն դատարանների ծանրաբեռնվածության թեթեւացման համար, եւ կարիք կա գործուն քայլեր կատարել քաղաքացիական եւ քաղաքացիական դատավարության օրենսդրության բարելավման, էլեկտրոնային արդարադատության միասնական կառավարման համակարգի ներդրման համար, որոնք էապես կնպաստեն Հայաստանի Հանրապետության դատաիրավական համակարգի զարգացմանը:

ՆԱԻՐԱ ՀՈՎՀԱՆՆԻՍՅԱՆ