Ինչպես գիտենք, հունիսի 1-ին առեղծվածային ու ողբերգական դեպք էր տեղի ունեցել Երեւանում։ Ժամը 12։00-ի սահմաններում ՀՀ ներքին գործերի նախարարության ոստիկանության Մալաթիայի բաժին ահազանգ էր ստացվել, որ Սվաճյան փողոցի շենքերից մեկի 1-ին հարկի տանիքում կնոջ դի կա եւ վիրավոր երեխա։ Քիչ անց հայտնի դարձավ, որ ողբերգական դեպքի զոհերը հաղորդավարուհի, բլոգեր Օվսաննա Սողոյանն է եւ նրա 11-ամսական փոքրիկը՝ Րաֆֆին:
Ահասարսուռ դեպքի առթիվ Օվսաննա Սողոյանի ընկերները, շոկի ենթարկված, սոցիալական ցանցերում գրառումներ են իրականացրել:
Հաղորդավարուհի Հրաչուհի Ութմազյանը, անդրադառնալով ցավալի լուրին, հրապարակում էր արել «Ինստագրամ»-ի «Սթորի» բաժնում եւ լուսանկար հրապարակել:
«Ժողովուրդ» օրաթերթը հաղորդավարուհի Հրաչուհի Ութմազյանից տեղեկացավ, որ Օվսաննայի հուղարկավորությունն արդեն տեղի է ունեցել, եւ նա նշեց, որ չի կարող խոսել, քանի որ շատ ծանր է իր համար:
Իսկ մինչ իրավապահ համակարգը կբացահայտի, թե ինչ է իրականում տեղի ունեցել, մեզ հայտնի դարձավ, որ առեղծվածային դեպքի մասին Օվսաննայի շրջապատում տարբեր վարկածներ են պտտվում: Ըստ շրջանառվող լուրերի՝ երեխայի ծնունդից հետո Օվսաննա Սողոյանը կրոնական կազմակերպությունների միջոցառումների է մասնակցել եւ ունեցել է առողջական որոշակի խնդիրներ:
Ի դեպ, ինչպես տեղեկանում ենք Օվսաննայի ֆեյսբուքյան էջից, նա մայիս ամսվա սկզբին էր վերադարձել Բալիից եւ կիսվել իր տպավորություններով:
Լ. Ե.
ԱՐԶԱՔԱՆՑՅԱՆԸ ԳՆԵԼ Է «ԲԱՑ TV»-ԻՆ
«Ժողովուրդ» օրաթերթի տեղեկությունների համաձայն՝ գործարար, նախկին պատգամավոր, «Ուժը հայրենյաց» կուսակցության նախագահ Տիգրան Արզաքանցյանը գնել է «Բաց TV»-ի յութուբյան ալիքը:
Նշենք, որ ավելի վաղ «Ժողովուրդ» օրաթերթը գրել էր, որ Տիգրան Արզաքանցյանն ու կինը՝ Նատալյա Ռոտենբերգը, արդեն տեւական ժամանակ է, ինչ ընդհատակ են անցել:
Նատալյա Ռոտենբերգը Երեւանի կենտրոնում` Մաշտոցի պողոտայում, իր անունը կրող բրենդային խանութը փակել է, սակայն «Ժողովուրդ» օրաթերթի տեսախցիկը ֆիքսեց, որ «Մարիոթ» հյուրանոցում առկա խանութ-սրահի մասնաճյուղը բաց է իր հաճախորդների համար:
Հիշեցնենք, որ դեռեւս անցած տարի՝ հունիսին, Տիգրան Արզաքացյանի կինը՝ Նատալյա Ռոտենբերգը, հայտարարեց, որ մտադիր է առաջադրվել Երեւանի ավագանու ընտրություններում «Ուժ հայրենյաց» կուսակցությունից։
Արդեն հունիսի 9-ին հայտնի դարձավ, որ Ռոտենբերգի՝ Ուեսթմինսթերում գտնվող, 8,73 մլն ֆունտ ստերլինգ արժողությամբ բնակարանը առգրավվել է այն բանից հետո, երբ նա չի վճարել հիփոթեքը. այս մասին հայտնում էր Daily Mail-ը:
ԼԻԴԱ ԵՂԻԱԶԱՐՅԱՆ
ԽԱՉԱՆՈՎԸ՝ ՏԱՍՆՅԱԿՈՒՄ
2020թ. Օլիմպիական խաղերի փոխչեմպիոն, աշխարհի 11-րդ ռակետ Կարեն Խաչանովը Ֆրանսիայի բաց առաջնության քառորդ եզրափակիչ դուրս գալու շնորհիվ կվերադառնա Պրոֆեսիոնալ թենիսիստների ասոցիացիայի դասակարգման լավագույն տասնյակ, որից դուրս էր մնացել 2019թ. նոյեմբերին։
Պատմության մեջ առաջին անգամ լավագույն տասնյակում կլինի երեք ռուսաստանցի։ Դանիիլ Մեդվեդեւն ու Անդրեյ Ռուբլյովը կպահպանեն տեղը առաջատարների թվում։
«Ռոլան Գարոսի» քառորդ եզրափակչում Խաչանովը հունիսի 6-ին կմրցի աշխարհի երրորդ ռակետ, «Մեծ սաղավարտի» մրցաշարերի 22-ակի չեմպիոն, սերբ Նովակ Ջոկովիչի հետ։
ՄԽԻԹԱՐՅԱՆԸ՝ ՉԼ ԵԶՐԱՓԱԿՉՈՒՄ
Հայաստանի ֆուտբոլի ազգային թիմի նախկին ավագ եւ իտալական «Ինտեր»-ի կիսապաշտպան Հենրիխ Մխիթարյանը մեծ ցանկություն ունի մասնակցելու Չեմպիոնների լիգայի եզրափակչին:
«Ամեն ինչ անելու եմ այդ եզրափակիչին մասնակցելու համար: Ցանկություն ունեմ հաղթելու այդ խաղում, քանի որ կարիերաս մոտենում է ավարտին, եւ կուզենայի հաղթել Չեմպիոնների լիգայում»,- ասել է Մխիթարյանը:
Հայ կիսապաշտպանի խոսքով` Չեմպիոնների լիգայի եզրափակիչի մրցակից «Մանչեսթեր Սիթի»-ն եվրոպական ակումբների շարքում ունի լավագույն կազմերից մեկը:
«Կարող ենք ցույց տալ, որ, գնդակին տիրապետելով, կարող ենք գրոհել»,-ասել է նա:
ԱՄՈՒՍՆԱՆՈՒՄ Է
Victoria’s Secret աշխարհահռչակ բրենդի հայ մոդել Ռուբինա Խանզադյանը պատրաստվում է հարսանիքին:
Մոդելն ինստագրամյան էջում կիսվել է «սթորիներով», որոնցում երեւում է, թե ինչպիսի Bride to be արարողություն են ընկերուհիները կազմակերպել իր համար:
«Սա լավագույն ճանապարհորդությունն էր, որի մասին ես կարող էի երազել»,-գրել է Ռուբինան:
Մոդելն իր էջում, սովորաբար, չի հանրայնացնում անձնականը, բայց նրա ընկերները հաճախ են նրան նշում սիրելիի՝ Գաբրիել Ռոսենի հետ համատեղ լուսանկարներում:
Ռուբինան ծնվել է Երեւանում, սակայն մանկության շրջանում տեղափոխվել է Իսպանիա, որտեղ ապրել է 13 տարի, մինչեւ որ ընտանիքով որոշել են մեկնել Միացյալ Նահանգներ:
.gif)
