Գառնու տաճարի մոտակայքում սրճարան կառուցելը հարուցել է հասարակական լայն շրջանակների դժգոհությունը: Շինաշխատանքները դադարեցնելու նպատակով այսօր մի խումբ ակտիվիստներ մեկնել էին տաճար` փորձելով խոչընդոտել շինաշխատանքների իրականացմանը` դրանով արտահայտելով իրենց դժգոհությունը:
Armlur.am լրատվականի թղթակցի հետ զրույցում «Արորդիների Ուխտ»-ի գերագույն մեհենական խորհրդի նախագահ, քուրմ Գագիկ Հայրապետյանը, որը ևս դեմ է սրճարանի կառուցմանը և այսօր ակտիվիստների հետ մեկնել էր Գառնի, ասաց, որ շինաշխատանքները ժամանակավորապես`5 օրով, դադարեցվել են: «Երեկ Գառնի էին եկել մշակույթի փոխնախարար Արև Սամուելյանը, Գառնու գյուղապետը և մեզանից մի քանիսը: Անհրաժեշտ է այս հարցի շուրջ բանակցել ու գալ ընդհանուր հայտարարի»,- մանրամասնեց պրն Հայրապետյանը:
«Արորդիների Ուխտ»-ի գերագույն մեհենական խորհրդի նախագահի խոսքով` ճաշարանի փոխարեն իրենք առաջարկել են կառուցել թանգարան:«Արդեն գտել ենք հովանավորներ, որոնք պատրաստ են ֆինանսապես աջակցել, որ թանգարանը ստեղծվի: Բնականաբար, կառույցը պետք է ստեղծվի տաճարի տարածքից դուրս`ճիշտ տեղում: Թանգարանում կցուցադրվեն Գառնիում հայտնաբերված գտածոները, որոնք պահեստներում թափված են»,- եզրափակեց Գագիկ Հայրապետյանը:
Սոնա Դավթյան
.gif)
