ՖՈՏՈ․ «Քիմիկների զորամասի» անհետ կորած զինծառայողների ծնողները պահանջում են հանդիպում Փաշինյանի հետ․ ինչ է կատարվում Կառավարության շենքի դիմաց

Այս պահին «Քիմիկների զորամասի» անհետ կորած զինծառայողների ծնողները, գերիների, պատանդների ծնողները ՀՀ կառավարության շենքի դիմաց են եւ հանդիպում են պահանջեում Նիկոլ Փաշինյանի հետ։

Ինչպես հայտնի է՝ գեներալ-լեյտենանտ Անդրանիկ Մակարյանը, որը Կովսականի մարտական հատուկ առաջադրանքի պատասխանատուն էր՝ տեղեկանալով, որ Արսեն Աբգարյանի խումբը շրջափակման մեջ է հայտնվել, օգնության չի շտապել, նահանջի հրաման է տվել, իսկ ինքը վերադարձել է Կապան։

Այս ամենի հետևանքով, ինչպես ընդունված է ասել, «Քիմիկների» զորամասի 40 զինծառայողներից 5-ը գերեվարվել է, 12-ը՝ սպանվել, իսկ մնացած 23 զինծառայողներն ու ավտոբուսի վարորդն անհետ կորել են։

Նկատենք նաև, որ այս առնչությամբ հարուցված դատական գործը ընթացքի մեջ է, և ծնողները դժգոհում են նաև դատավարությունից։ Որպես մեղադրյալ ներգրավված է Գլխավոր շտաբի պետի նախկին տեղակալ Անդրանիկ Մակարյանը, ով իր մեղքը չի ընդունում։ Ըստ մեղադրանքի, նրա և երկու հրամանատարների պատճառով են ավելի քան 60 զինվորականները հայտնվել ադրբեջանական շրջափակման մեջ Զանգելանում։ 62 զինվորականներից միայն 20-ին է հաջողվել դուրս գալ ադրբեջանական շրջափակումից, մյուսների մի մասը մահացել են, 23-ը համարվում են անհետ կորած։ Պատերազմի հետևանքով անհետ կորած է համարվում ավելի քան 200 մարդ։

Քնար Մանուկյան