«Ժողովուրդ»-ը զրուցեց Աժ մինչ այս անկախ պատգամավոր Լյովա Խաչատրյանի հետ` պարզելու` ճի՞շտ են մեր տեղեկությունները, որ նա անդամագրվել է «Օրինաց երկիր» կուսակցությանը:
-Չի բացառվում: Բայց դեռ 15-20 րոպե չի անցել, Դուք ո՞նց իմացաք:
-Այնուամենայնիվ, ինչո՞ւ հենց ՕԵԿ:
-Անկեղծ ասած, մի բառով կպատասխանեի` լավ եմ արել: Բայց քանի որ պատգամավոր եմ, քաղաքականության մեջ եմ ու «լավ անել» հասկացողություն գոյություն չունի, սխալ կընկալվի, ստիպված եմ բացատրություն տալ:
-Հայտնի է, որ այսօր ՕԵԿ-ն այնքան էլ հեղինակավոր կուսակցություն չէ: Բացի այդ, ՀՀԿ-ն կարծես ավելի «մոդայիկ» է:
-Երբ շատ մարդ մի տեղ է սկսում վազել, անպայման դրանց մեծ մասը կամ մի մասը ոտնատակ է լինում, որովհետեւ մանավանդ մեր նման փոքր երկրում էդքան մեծ պրոսպեկտ չունենք: Այդ իսկ պատճառով ես ընտրեցի ավելի դժվար ճանապարհ, որտեղով հաճելի լինի քայլել:
-Իսկ մինչեւ ո՞ւր եք քայլելու ՕԵԿ-ի հետ:
-Ես նույնն եմ մնալու, ես աշխատելու եմ լինել խորհրդարանում, որովհետեւ իմ ընտրողն է ուզում: Ես ուրիշ հակումներ չունեմ ու այսօրվա իմ քայլը մի շարք բաներով է բացատրվում: Նախ օրենքն է պահանջում, որպեզսի որեւէ կուսակցության անդամակցես: Մինչ այժմ այդ պահանջը չկար: Բացի այդ, ես նախագահի թիմի անդամ եմ, հետեւաբար պետք է լինեմ նախագահի համակիր գաղափարակից կուսակցություններից մեկում: Իշխող 3 կուսակցություն կա խորհրդարանում. Հանրապետական, «Օրինաց երկիր» եւ «Բարգավաճ Հայաստան»: Հանրապետականը կարծեք թե ծանրաբեռնված է անհասկանալի: Միգուցե իմ անհրաժեշտությունն էլ չունի, ուրեմն պիտի գնամ ՕԵԿ, որտեղ ստիպված չեմ լինի իմ տեսակը փոխել, կաշկանդվել: Ես կլինեմ ազատ:
-Իսկ Ձեզ նման երաշխիքներ տրվե՞լ են:
-Ես համոզված եմ, որ չի լինի իմ հանդեպ նման սահմանափակում, որովհետեւ մի բանի եմ ձգտում. այնպես անել, որ երկիրը լինի կայուն զարգացող:
-Ձեզ բավարարո՞ւմ է գյուղատնտեսության նախարարի աշխատանքը:
-Հիմա բավարարում է: Ուղղակի այդ նախարարությունը խնդիր ունի, քանի որ մենք նախարարությանը ամորձատել ենք, զրկել ենք ամբողջական իրավունքներից, բայց ամբողջական արդյունք ենք ուզում: Ես Ազգային Ժողովում վիճել եմ գյուղնախարարի հետ, բոլորն են հիշում, բայց այսօր ընկերներ ենք դարձել: Ես հասկացա, որ նա ուզում է աշխատել: Ի՞նչ անի գյուղնախարարը, որ հանկարծ մի դեղամիջոց է մտնում Հայաստան, մարդիկ «սրսկում» են ու բերք չեն ստանում:
-Մի անգամ ասել էիք, որ եթե Ձեր ընկեր Կարեն Կարապետյանն ասի, Դուք կընտրվեք 70 տոկոսով: Հիմա նա տեղյա՞կ է, որ Դուք ՕԵԿ-ական եք դարձել:
-Ես համոզված եմ, որ նա կողջունի իմ որոշումը:
-Չե՞ք ճշտել իր հետ:
-Ես համոզված եմ, որ նա կողջունի իմ որոշումը:
-ՕԵԿ-ն, այնուամենայնիվ, գլխավոր դատախազի թիմի հետ խնդիրներ ունի: Ի՞նչ եք կարծում, դատախազի թիմն ինչպե՞ս կընդունի Ձեր որոշումը:
-Ես թիմերի չէի բաժանի, որովհետեւ քաղաքականությամբ զբաղվում են քաղաքական կուսակցությունները, եւ նախագահն է միշտ հետամուտ լինում, որ յուրաքանչյուրն իր գործով զբաղվի: Բոլորն ամեն ինչով զբաղվեցին, դրա համար էլ դժգոհության ալիքն այսքան մեծացավ: Կարծում եմ, որ սրանից հետո բոլորն իրենց գործով կզբաղվեն` քաղաքական կուսակցություններն` իրենց, հացթուխը` հաց կթխի, եւ երկրում ամեն ինչ կկարգավորվի:
-Դուք, փաստորեն, պատգամավորական մանդատի համար կուսակցություն ընտրեցիք: Արժե՞ր:
-Աշխարհը չի հորինել մեկ այլ ձեւ` երկիրը կառավարելու: Ամբողջ աշխարհում երկիրը կառավարվում է կուսակցությունների միջոցով: Կուսակցությունն ինձ համար մնում է եւ մնալու է որպես գործիք` իմ ծրագրերն իրականացնելու, գյուղացուն օգնելու համար:
-Մի պահ կար, որ ինքներդ էիք ուզում կուսակցություն բացել: Այլեւս նման ցանկություն չունե՞ք:
-Դա ուրիշ պահ էր: Այդ շրջանում բոլորն էին բացում, մենք էլ բացեցինք` ապացուցելու, որ դա դժվար բան չէր: Բայց դա ես սխալ եմ համարում: Նորմալ երկրներում 4-5 կուսակցություն կա, ես դրա ջատագովն եմ:
-Իսկ եթե Արագածոտնում Ձեր դեմ իր թեկնածությունն առաջադրի ԲՀԿ-ից Արագած Ախոյանը, եւ նրան սատարի գլխավոր դատախազ, «Նիգ-Ապարան» ՀՄ պատվավոր նախագահ Աղվան Հովսեփյա՞նը:
-«Նիգ-Ապարան» ՀՄ-ն նաեւ ես եմ: Նման բան լինել չի կարող: Ինձ պրովոկացիոն հարցեր մի՛ տվեք: Իսկ որ կառաջադրվեն շատերը, ինչպես միշտ, ես դրան պատրաստ եմ: Ժողովուրդը դրան պատրաստ է: Ինձ չի վախեցնի, չի վհատեցնի, ես ավելի ուրախ կլինեմ, որ պայքարի արդյունքում հաղթեմ: Իսկ որ հաղթելու եմ, դրանում չեմ կասկածում: Ասեմ, որ իմ ունեցվածքին որեւէ բան չի ավելացել պատգամավորության ժամանակ: Միայն պակասել է:
-Պարո՛ն Խաչատրյան, Արթուր Բաղդասարյանին Քոչարյանն ասաց դավաճան, հետո Սերժ Սարգսյանը նշանակեց ԱԱԽՔ, հիմա Դուք նրա թիմի անդամ եք:
-Ես այդ ամենին լուրջ չեմ վերաբերվում: Դա քաղաքական սեւ PR էր: Ես հանգիստ եմ ընդունում նման բաները: Մի ականջով մտնում, մյուսով դուրս է գալիս: Քաղաքական պայքարի ձեւ է, որն ինձ խորթ է:
-Բայց ամեն դեպքում, ինչո՞ւ ՕԵԿ:
-2003թ. երբ ընտրվեցի, Արթուր Վահանիչն ինձ ուզում էր տեսնել ՕԵԿ-ում: Այն ժամանակ հրաժարվեցի, որովհետեւ ես ինձ կուսակցական չէի պատկերացնում եւ խոստացա, որ եթե երբեւէ կուսակցական դառնամ, ապա ՕԵԿ-ական կդառնամ: Այդ կուսակցության, Արթուր Բաղդասարյանի հետ միշտ պահպանվել են փոխադարձ վստահելի հարաբերություններ: Այսօր այդ կուսակցությանն անդամակցում է կայացած եւ վստահելի քաղաքական եւ տնտեսական ոլորտի մասնագետների մեծ բազմություն: Իմ մի շարք օրենսդրական նախաձեռնություններ` բանկերի, վարկերի, սնանկության հետ կապված, երկար ժամանակ շրջանառության մեջ են, որոնցով առաջարկում եմ սահմանափակել բանկերի ախորժակը եւ չեմ կարողանում առաջ տանել, որովհետեւ չունեմ քաղաքական կոնկրետ հենարան:
.gif)
