COVID-19-ը դեռ գոյություն ունի. ու՞մ է սպառնում այն

Կար ժամանակ, երբ COVID-19-ը վտանգ էր ներկայացնում մարդկանց լայն շրջանակի համար, սակայն այժմ անհրաժեշտ է կենտրոնանալ հիվանդների խոցելի խմբերի պաշտպանության վրա։ Առաջին հերթին դրանք ծանր քրոնիկ հիվանդություններ և թույլ իմունիտետ ունեցող մարդիկ են, «Իզվեստիային» ասել է ռևմատոլոգ Պավել Նովիկովը։

Հուլիսի վերջին ՌԴ Առողջապահության նախարարությունն առաջարկեց հրաժարվել կորոնավիրուսի դեմ զանգվածային պատվաստումներից և անցնել խոցելի կատեգորիայի քաղաքացիների պատվաստումներին՝ պատճառաբանելով COVID-19-ի դեմ կոլեկտիվ իմունիտետի բարձր մակարդակի ձևավորումը և համաճարակային իրավիճակի կայունացումը։

«Այո, իսկապես, այսօր վիրուսը վտանգավոր է հիվանդների որոշակի խմբի համար, և դա պետք է ընդգծել։ COVID-19-ը դեռ գոյություն ունի, հազարավոր մարդիկ հիվանդանում են դրանով, հարյուրավոր հիվանդներ ամեն օր հոսպիտալացվում են, ցավոք դեռ մահեր են գրանցվում։ Այսօր նրանք են առաջին հերթին ամենախոցելիները, ովքեր ունեն ծանր քրոնիկ հիվանդություններ, նրանք, ում իմունային համակարգը լավ չի աշխատում։ Հենց նրանց մոտ է բարձր մնում կովիդային վարակի ծանր ընթացքի վտանգը»,- ասել է Նովիկովը։

Մասնավորապես, ըստ նրա, COVID-19-ով ամենածանր հիվանդներն են ուռուցքաբանական և արյունաբանական հիվանդություններով հիվանդները, հատկապես՝ քիմիաթերապիա ստացողները։

Խոսքը նաև հեմոդիալիզի վրա գտնվող երիկամների ծանր քրոնիկ հիվանդությամբ, փոխպատվաստված օրգաններով մարդկանց մասին է, նաև շաքարային դիաբետ, բրոնխոթոքային և սրտանոթային հիվանդություններ ունեցող հիվանդների լայն խմբի մասին։

«Նրանցից շատերի մոտ պատվաստանյութը կարող է լավ չաշխատել, այսինքն՝ նրանց պաշտպանության այլ մեթոդ է պետք՝ պասիվ իմունիզացիա, այդ թվում այն ​​պատճառով, որ պատվաստանյութով ակտիվ իմունիզացիան չի աշխատի, քանի որ կա իմունային անբավարարություն»,- ընդգծել է Նովիկովը։

Առողջապահության նախարարության գլխավոր սրտաբան, Ազգային բժշկական գիտահետազոտական ​​կենտրոնի գլխավոր տնօրեն, Ռուսաստանի գիտությունների ակադեմիայի ակադեմիկոս Եվգենի Շլյախտոն, հուլիսի 7-ին «Իզվեստիա»-ին տված հարցազրույցում առաջարկել էր ընդմիջում վերցնել կորոնավիրուսի դեմ պատվաստումներում։

Հունիսի 14-ին Ռուսաստանում Առողջապահության համաշխարհային կազմակերպության (ԱՀԿ) ներկայացուցիչ Մելիտա Վույնովիչը հայտարարել էր, որ կորոնավիրուսի համաճարակը գլոբալ վնաս է հասցրել աշխարհին, որը շատ դժվար է հաշվարկել տնտեսական առումով։

Մայիսի 5-ին ԱՀԿ-ի ղեկավար Թեդրոս Գեբրեյեսուսը հայտարարել էր, որ ԱՀԿ-ն հանել է COVID-19-ը համաճարակի կարգավիճակից։

Աղբյուր՝ shantnews.am