Ադրբեջանի ԱԳՆ կայքը ՀՀ տարածքում չի գործում․ օգտատերերի ահազանգներն ու փորձագետի անդրադարձը

Առավոտվանից համացանցում տեղեկություններ են տարածվում, թե Ադրբեջանի ԱԳՆ կայքը ՀՀ տարածքում չի գործում։ Ֆեյսբուքյան մի շարք օգտատերեր ահազանգում են՝ եթե չիմանանք, թե ինչ հայտարարություններ է տարածում Ադրբեջանի ԱԳՆ-ն, ապա ինչպե՞ս պիտի հասկանանք նրանց վարած քաղաքականությունը։ Armlur.am-ը կապ հաստատեց ԱԳՆ մամուլի խոսնակ Անի Բադալյանի հետ՝ հասկանալու՝ որն է խնդիրը։ Անի Բադալյանը պատասխանեց, թե հարցն իրենց տիրույթում չէ, սական իրենք շարունակում են հետևել ինչպես Ադրբեջանի ԱԳ նախարարության, այնպես էլ մյուս երկրների տարածած հաղորդագրություններին։

ArmLur.am-ն այս հարցին մասնագիտական վերլուծություն ստանալու համար կապ հաստատեց մեդիափորձագետ Սամվել Մարտիրոսյանի հետ, որն ասաց․
«Սովորաբար, ադրբեջանական պետական կայքերն իրենք են բլոկվում հենց իրենց կողմից՝ Հայաստանում չգործելու համար։ Արդեն տասը տարուց ավելի այս վիճակն է տիրում։ Հիմնականում այս խնդիրը կապված է լինում իրենց անվտանգության համակարգերի հետ։ Իրենք հարձակումներ են գրանցում և այդ դեպքում հայկական IP-ները փակվում են»,- ասաց նա։