«Ժողովուրդ» օրաթերթի տեղեկություններով՝ Հայաստանի ազգային ֆիլհարմոնիկ նվագախումբը (գեղարվեստական ղեկավար եւ գլխավոր դիրիժոր՝ Էդուարդ Թոփչյան) բացում է իր 98-րդ համերգաշրջանը:
Մեկնարկում է Երեւանյան միջազգային երաժշտական 15-րդ փառատոնը՝ նվիրված մեծն կոմպոզիտոր Արամ Խաչատրյանի ծննդյան 120-ամյակին:
Ողջ փառատոնի ընթացքում կհնչեն Արամ Խաչատրյանի հայտնի եւ սիրված ստեղծագործությունները: Բացման համերգին սեպտեմբերի 15-ին «Արամ Խաչատրյան» համերգասրահում հանդես կգա անվանի դաշնակահար, Չայկովսկու անվան միջազգային մրցույթի առաջին մրցանակակիր (2015թ.) Դմիտրի Մասլեեւը՝ դիրիժոր Վալենտին Ուրյուպինի ղեկավարությամբ: Ծրագրում կհնչեն Խաչատրյանի թիվ 1 Սիմֆոնիան եւ Պրոկոֆեւի Դաշնամուրի եւ նվագախմբի համար գրված թիվ 3 կոնցերտը:
Նշենք, որ փառատոնի նշանավոր իրադարձություններից են անվանի հայ մենակատար Սերգեյ Խաչատրյանի եւ Հայաստանի ազգային ֆիլհարմոնիկ նվագախմբի համերգները Մեղրիում, Կապանում, Գորիսում եւ Գյումրիում: Շրջագայությունը կեզրափակվի երեւանյան համերգով սեպտեմբեր 28-ին «Արամ Խաչատրյան» համերգասրահում: Համերգները կղեկավարի նշանավոր դիրիժոր Ստանիսլավ Կոչանովսկին, որը 2024/2025 համերգաշրջանում կստանձնի NDR Radio Philharmonic նվագախմբի գլխավոր դիրիժորի պաշտոնը:
15-րդ երեւանյան միջազգային երաժշտական փառատոնը այս տարի եւս աչքի է ընկնում աստղային մենակատարների կազմով. GRAMMY մրցանակակիր, ֆենոմենալ ջութակահար Ագուստին Հադելիխը հոկտեմբերի 2-ին կվերադառնա Հայաստան բացառիկ համերգով, որը կղեկավարի մաեստրո Էդուարդ Թոփչյանը, իսկ աշխարհահռչակ օպերային երգիչ, տենոր Ռամոն Վարգասը մենահամերգով հանդես կգա հոկտեմբերի 18-ին: Փառատոնի փակումը կնշանավորվի Ջուզեպպե Վերդիի «Պարահանդես-դիմակահանդես» օպերայի համերգային կատարմամբ:
Փառատոնի ընթացքում կկայանա նաեւ Ա. Խաչատրյանի վերջին հեղինակային ծրագրով համերգ, որտեղ կներկայացվեն կոմպոզիտորի հազվադեպ կատարվող կամերային ստեղծագործությունները:
Հավելենք, որ, ի մեծարումն Արամ Խաչատրյանի, կոմպոզիտորի 120-ամյակի շրջանակներում Հայաստանի ազգային ֆիլհարմոնիկ նվագախումբը հյուրախաղերով հանդես կգա Եվրոպայի, Ամերիկայի Միացյալ Նահանգների եւ Կանադայի այնպիսի հեղինակավոր համերգասրահներում, ինչպիսիք են Carnegie Hall, Le Maison Symphonique, Megaro Moussikis, Boston Symphony Hall, Roy Thomson Hall համերգասրահները: Համերգների ընթացքում Հայաստանի ազգային ֆիլհարմոնիկ նվագախմբի հետ հանդես կգան հայ անվանի մենակատարներ դաշնակահար Սերգեյ Բաբայանը, ջութակահարներ Սերգեյ Խաչատրյանը եւ Անուշ Նիկողոսյանը՝ մաեստրո Էդուարդ Թոփչյանի ղեկավարությամբ:
ՑՈՒՑԱԴՐՈՒԹՅՈՒՆ՝ ԼՈՆԴՈՆՈՒՄ
«Ժողովուրդ» օրաթերթի տեղեկություններով՝ Theatre Royal Drury Lane-ում Լոնդոնի նորաձեւության շաբաթվան ընդառաջ կայացավ Vogue World. London միջոցառումը՝ նշանավորելով բրիտանացի խորհրդանշական ստեղծագործողներին՝ Շեքսպիրից մինչեւ Սթորմզի, եւ ապահովելով Մեծ Բրիտանիայի հարուստ մշակութային բեմի ապագան:
Ցուցադրությունը բացել է 49-ամյա Քեյթ Մոսը՝ Ջոն Գալիանոյի կողմից հատուկ իր համար ստեղծված զգեստով։ Թեեւ շոուի բացման արարողությունը ձոն էր դասական գեղեցկությանն ու դրա վաղանցիկ բնույթին իր բոլոր ձեւերով, օձիքավոր զգեստը նաեւ սիրային նամակ էր հենց մոդելին: «Քեյթ, սիրելի Քեյթ»,-Vogue-ին ասել է Maison Margiela-ի կրեատիվ տնօրեն Գալիանոն՝ բացատրելով զգեստի մեկնարկային կետը։ «Ես իսկապես ոգեշնչվել եմ Քեյթից, նրա անհավատալի փխրունությունից՝ գրեթե Մերլինի (Մոնրոյի) նման, եւ այդ շլացնող մագնիսականությունից, որը գրավում է»:
Նշենք, որ ցուցադրության ամենակարեւոր իրադարձությունը լեգենդար սուպերմոդելներ Քրիստի Թարլինգթոնի, Լինդա Էվանգելիստայի, Նաոմի Քեմփբելի եւ Սինդի Քրոուֆորդի հայտնվելն էր։ Բրիտանական Vogue-ի խմբագիր Ջեք Բորկետը շողշողացող կերպարներ էր ընտրել AppleTV+ սերիալի «Սուպերմոդելների» ապագա աստղերի համար: «Այս զգեստները հիացնում են ոչ միայն իրականում, այլեւ վիրտուալ»:
Քրիստիի կերպարը Fendi-ի՝ 2023 թվականի աշնանային կուտյուրի առաջարկի արդյունքն էր՝ ոգեշնչված Դելֆին Դելետրեսի բարձր ոսկերչական դիզայնով: «Այն գրեթե օրգանական էր ստացվել՝ գույներով եւ ասեղնագործությամբ, որոնք հիմնված են բնական քարերի, սուտակի եւ շափյուղայի երանգների վրա»,-Vogue-ին պատմել է Քիմ Ջոնսը՝ խոսելով հավաքածուի մասին, որը միախառնում էր 90-ականների մինիմալիզմը դասական քանդակագործության օրինակների հետ:
Հավելենք, որ Լինդան ապշեցուցիչ կերպարով է հայտնվել Valentino-ի աշուն-ձմեռ 2023 շոուի ժամանակ, մինչդեռ Նաոմին ընտրել է բրիտանացի դիզայներ Ալեքսանդր Մաքքուինին՝ զմրուխտ կանաչ զգեստով։
Ինչ վերաբերում է Սինդիին, Դոնաթելլա Վերսաչեն մոդելի տեսքը ստեղծել է՝ իր՝ աշուն/ձմեռ 2023 հավաքածուի հիման վրա։
ՈՍԿԵ ՄԵԴԱԼԱԿԻՐ
Հայաստանի հրաձգության հավաքականի անդամ Էլմիրա Կարապետյանը դարձել է աշխարհի գավաթի խաղարկության ոսկե մեդալակիր:
«Ժողովուրդ» օրաթերթի տեղեկություններով` բրազիլական Ռիո դե Ժանեյրո քաղաքում ընթացող աշխարհի գավաթի խաղարկության 10 մետր օդամղիչ ատրճանակ ձեւի կանանց պայքարում Էլմիրա Կարապետյանը, հավաքելով 236.6 միավոր, գրավեց առաջին հորիզոնականը: Երկրորդ եւ երրորդ տեղերում Չինաստանի ներկայացուցիչներն են:
Էլմիրա Կարապետյանը Հայաստանի դեռեւս միակ մասնակիցն է Փարիզի 2024 թվականի օլիմպիական խաղերում:
ՈՒԵՖԱ-Ն՝ ԸՆԴԴԵՄ ՀՖՖ-Ի
Եվրոպական ֆուտբոլային ասոցիացիաների միությունը (ՈՒԵՖԱ) կարգապահական գործ է հարուցել Հայաստանի ֆուտբոլի ֆեդերացիայի դեմ՝ Երեւանում «ԵՎՐՈ-2024»-ի ընտրական փուլի շրջանակներում տեղի ունեցած Հայաստան-Խորվաթիա հանդիպման ժամանակ տեղի ունեցած միջադեպերի առնչությամբ։
Ինչպես փոխանցում է gazeta.ru-ն, ՀՖՖ-ին մեղադրանք է առաջադրվել մարզադաշտում հասարակական անցումները արգելափակելու, քաղաքական սադրիչ հաղորդագրությունների, պիրոտեխնիկայի եւ խաղը ուշ սկսելու համար։
Նշվում է, որ Հայաստանի հավաքականի գլխավոր մարզիչ Ալեքսանդր Պետրակովը կարող է պատասխանատվության ենթարկվել։
Անցյալ շաբաթ Ադրբեջանի ֆուտբոլի ֆեդերացիան բողոք էր ուղարկել ՈՒԵՖԱ՝ ընդդեմ Հայաստանի ֆուտբոլի ֆեդերացիայի՝ Հայաստան-Խորվաթիա հանդիպման ժամանակ Երեւանի մարզադաշտի վրայով Լեռնային Ղարաբաղի դրոշով անօդաչու թռչող սարքի արձակման կապակցությամբ։
ԸՆԿԵՐԱԿԱՆ ՀԱՆԴԻՊՈՒՄ
Հայաստանի ֆուտբոլի ազգային հավաքականը հոկտեմբերի 17-ին ընկերական հանդիպում կանցկացնի Հյուսիսային Մակեդոնիայի ընտրանու հետ։
«Ժողովուրդ» օրաթերթի տեղեկություններով՝ հանդիպումը կկայանա Ստրումիցա քաղաքի «Մլադոստ» մարզադաշտում։
ԼԱՎԱԳՈՒՅՆ ՖՈՒՏԲՈԼԻՍՏՆԵՐԻՑ Է
Մադրիդի «Ռեալի» եւ Պորտուգալիայի հավաքականի նախկին խաղացող Լուիշ Ֆիգուն բարձր է գնահատել Արքայական ակումբի նորեկ, Անգլիայի հավաքականի 20-ամյա կիսապաշտպան Ջուդ Բելինգեմի որակները։
«Բելինգեմը շատ ուժեղ մեկնարկեց «Ռեալում» եւ շատ արագ հարմարվեց Արքայական թիմում։
Անկասկած, Բելինգեմն արդեն աշխարհի լավագույն ֆուտբոլիստներից մեկն է։ Չնայած երիտասարդ տարիքին՝ նա նվիրված է գործին եւ մեծ տաղանդ ունի»,- Ֆիգուի խոսքը մեջբերում է իսպանական AS-ը։
Իսպանիայի առաջնության առաջին չորս տուրերում Բելինգեմը խփել է 5 գոլ, կատարել 1 գոլային փոխանցում։
.gif)
