ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահի ժամանակավոր պաշտոնակատար Ռուստամ Բաքոյանը սոցցանցի իր էջում գրում է․ «Վերջին օրերին հասարակության մեջ առկա ատելության խոսքի բարձր աստիճանը, բռնության և անհանդուրժողականության ակնհայտ դրսևորումները հասել են վտանգավոր չափերի։
Հայրենիքի հանդեպ զգոնությամբ և նվիրումով ծառայող, մարդու և քաղաքացու` Սահմանադրությամբ ամրագրված իրավունքների և ազատությունների հարգման և պաշտպանության սկզբունքներով առաջնորդվող շատ ոստիկաններ, որոնք նաև 44-օրյա պատերազմի ժամանակ անձնվիրաբար պայքարել են թշնամու դեմ, այսօր էլ փաստացիորեն պայքարում են մեր պետականության խարխլման դեմ, առավել քան երբևէ հասարակության կողմից առնվազն հարգանքի և պատշաճ վերաբերմունքի կարիք ունեն։
Հայաստանի Հանրապետության՝ որպես իրավական պետության բնորոշ գծերից է օրենքի գերակայությունը, և յուրաքանչյուր ոք պարտավոր է հարգել Հայաստանի Հանրապետության օրենքները, իսկ իրավահպատակ ուղուց շեղվող ցանկացած անձ անխուսափելիորեն յուրաքանչյուր դեպքում արժանանալու է պատշաճ իրավական գնահատականի։
Ուշադիր հետևում եմ տեղի ունեցող իրադարձություններին և հարկ եղած դեպքում պատրաստ եմ օրենսդրությամբ ինձ վերապահված լիազորությունների շրջանակում գործել՝ հանուն մարդու իրավունքների հարգման և պաշտպանության։
Սիրելի՛ ՀՀ քաղաքացիներ, կոչ եմ անում հեռու մնալ սադրանքներից, մանիպուլյատիվ գործողություններից և ձեր քայլերով չվնասել ՀՀ պետականությանը։
.gif)
