Տավուշի մարզի միջազգային հայրենակցական միությունը բաց նամակ է հղել միջազգային կազմակերպություների ներկայացուցիչներին, պահանջելով բարձրաձայնել 77-ամյա Մամիկոն Խոջոյանին Ադրբեջանում գերության ընթացքում խոշտանգելու փաստը: Միությունը նաև մտահոգված է օրեր առաջ Ադրբեջանում հայտնված Արսեն Խոջոյանի ճակատագրով: Բաց նամակն ուղղված է մի շարք կառույցներին ` այդ թվում նաև ԵԱՀԿ երևանյան գրասենյակի ղեկավար, դեսպան Ա. Սորոկինին, Կարմիր խաչի միջազգային կոմիտեի Հայաստանի պատվիրակության ղեկավար Ս. Էպրեխտին:
Armlur.am լրատվականի թղթակիցը փորձեց ԵԱՀԿ երևանյան գրասենյակից պարզել ` ինչ ընթացք է տրվել նամակին: ԵԱՀԿ երևանյան գրասենյակի մամուլի և հանրային կապերով պատասխանատու Գոհար Ավագյանը մեզ փոխանցեց, որ ԵԱՀԿ երևանյան գրասենյակը նամակը փոխանցել է ԵԱՀԿ կենտրոնակայան, որը գտնվում է Վիեննայում, քանի որ ԵԱՀԿ երևանյան գրասենյակն այդ հարցերով չի զբաղվում:
Զրուցեցինք նաև Կարմիր խաչի միջազգային կոմիտեի (ԿԽՄԿ ) հայաստանյան պատվիրակության հաղորդակցման ծրագրերի պատասխանատու Զառա Ամատունու հետ այս և մի քանի այլ հարցերի առնչությամբ:
-ԿԽՄԿ-ն ի՞նչ ընթացք է տրվել Տավուշի մարզի միջազգային հայրենակցական միության նամակին:
-Մեր կազմակերպությունը հանրային հարթակներում գնահատական չի տալիս, աշխատում է իշխանությունների հետ գաղտնի պաշտոնական երկխոսության ձևաչափով: Ցանկացած հարց, որը վերաբերում է քաղաքացուն կամ ռազմագերուն (դա կլինի նրա պահման պայմաններին, առողջական վիճակին), մեր ուշադրության կենտրոնում է, պարզապես բոլոր այն քայլերը, որոնք արվում են մեր կողմից, մնում են հանրային ուշադրությունից դուրս:
– Տավուշի մարզի միջազգային հայրենակցական միությունը մտահոգություն ունի, որ Ադրբեջանը անմարդկային կերպով կվերաբերվի նաև օրեր առաջ գերի ընկած Արսեն Խոջոյանի հետ, ինչպես արել է Հայաստան վերադարձած Մամիկոն Խոջոյանի հետ, հետևաբար պետք է ճնշումներ գործադրել Բաքվի վրա:
-Մեր կազմակերպությունը չի կարող որևէ գնահատական հնչեցնել, առավել ևս ճնշումներ գործադրել Ադրբեջանի վրա, քանի որ նման լծակներ չունի: Մենք փորձում ենք երկխոսություն վարել տարբեր երկրների իշխանությունների հետ և հիշեցնել Ժնևի կոնվենցիաները, որոնք ստորագրել են թե Հայաստանը, թե Ադրբեջանը, և դրանք երկու երկրների ազգային օրենսդրության մի մասն են կազմում:
– Համաձայնեք, որ Ադրբեջանն է միշտ խախտում հենց այդ կոնվենցիաների դրույթները:
–Չեմ կարող համաձայնել, քանի որ նման բան ասելու համար բոլոր փաստերը պետք է ուսումնասիրել: Այսպես ասեմ `համաձայնել կամ չհամաձայնել, նշանակում է հանրային ինչ-որ կարծիք տալ: ԿԽՄԿ-ի առաքելությունն այն է, որ նա մուտք ունի և աշխատում է Ադրբեջանում պահվող հայ գերիների հետ: Մենք իրավունք չենք վերապահում մեզ գնահատական տալ, քանի որ չենք ցանկանում կորցնել և վտանգի տակ դնել Բաքվում և ընդհանրապես որևէ երկրում պահվող մեր քաղաքացիներին այցելելու հնարավորությունը :
–Հայրենակցական միությունը նամակում բարձրաձայնում է, որ Ադրբեջանը խախտել է ժնևյան չորրորդ կոնվենցիան, քանի որ խաղաղ բնակչի` Մամիկոն Խոջոյանի նկատմամբ ցուցաբերել է անմարդկային վերաբերմունք, հետևաբար այս մի փաստը հիմք ընդունելով ` կարո՞ղ է ԿԽՄԿ-ը հստակ գնահատական տալ:
-Կարմիր խաչի միջազգային կոմիտեն կարող է միայն շատ ծայրահեղ դեպքերում կարող է հանրայնորեն տեսակետ հայտնել: Մեր կազմակերպությունն օգտագործում է բոլոր միջոցները կառուցողական երկխոսություն իրականացնելու համար: Միայն այն դեպքում, երբ ԿԽՄԿ-ը վստահ է, որ չի վտանգի իր շահառուին, նա կարող է հանրայնորեն հայտարարություն անել:
-Ադրբեջանում գտնվող Հակոբ Ինջիղուլյանի գործի հետ առնչությամբ հասարակության մի մասը թերի է համարում և դժգոհ է Կարմիր խաչի աշխատանքից: Ինչո՞վ է դա պայմանավորված:
–Մեզ նման բան կարող են վերագրել, քանի որ մենք քիչ ենք խոսում: Ես փորձում եմ բացարձակ թափանցիկ լինել բոլորի հետ: Բայց աշխատանքի ծավալը չիմանալով ` գնահատական տալ, կարծում եմ ` այդքան էլ ճիշտ չէ:
-Ե՞րբ է նախատեսված հաջորդ հանդիպումն Հակոբ Ինջիղուլյանի հետ:
-Առայժմ որևէ տեղեկատվություն չկա, չեմ կարող ասել, երբ է լինելու հաջորդ հանդիպումը, բայց աշխատանք տարվում է:
Սոնա Դավթյան
.gif)
