Շուրջ մեկ ամիս է Բրազիլիայի հրապարակում՝ Հրազդան մարզադաշտի հարակից տարածքում, դիտահորը վնասվել է։ Ջուրը հոսում է, մեքենաներն էլ, հատկապես գիշերային ժամերին ցածր տեսանելիության պայամաններում, վնասվում են: Պարբերաբար վնասված այս դիտահորի շրջակայքում տարբեր առարկաներ են դրվում՝ որպես զգուշացում:
Ի սկզբանե հատուկ ժապավեն էր, ավելի ուշ՝ մեքենաների անվադողեր:
Քաղաքացիները «Ժողովուրդ» օրաթերթի խմբագրություն են դիմում ահազանգով, որ պարբերաբար փորձել են կապ հաստատել եւ լուծում պահանջել քաղաքապետարանից, ջրմուղից, սակայն ապարդյուն:
ArmLur.am-ին քաղաքապետարանի լրատվության վարչությունից տեղեկացրին, որ դիտահորը հարակից տարածքում գտնվող բենզալցակայանինն է.
«Քաղաքապետարանի հետ պայմանավորվածություն է ձեռք բերվել, որ բենզալցակայանը իր միջոցներով պետք է այդ հարցը լուծի: Քաղաքապետարանի տիրույթից դուրս է, սակայն տեղյակ ենք եւ աշխատում ենք նրանց հետ, որ նրանք այդ հատվածը նորոգեն»:
Փաստորեն ստացվում է՝ շուրջ մեկ ամիս է, ինչ այդ պայմանավորվածությունը չի պահպանվում, իսկ քաղաքացիները շարունակում են մայրաքաղաքում տհաճությունների բախվել ու վնասվել:
Մ.Ղ.
.gif)
