Կարեն Մկրտչյանի բուժվելու հավանականությունը շատ մեծ է

Մոտ երկու ամիս է, ինչ դերասան, ազատամարտիկ Կարեն Մկրտչյանն անվանասայլակին է, և նրա առողջական վիճակում դրական դինամիկա չկա: Դերասանին օգնելու համար  կազմակերպվել է դրամահավաք: Թե որքան գումար է հավաքվել, պարզեցինք Կարեն Մկրտչյանի հորից` Գրիշա Մկրտչյանից:

-Պարո՛ն Մկրտչյան, ինչպե՞ս  է իրեն զգում  ձեր որդին:

-Նույն է վիճակը, փոփոխություն չկա: Դեպի վատը չի գնում, դեպի լավն էլ չի գնում: Ստաբիլ է վիճակը: Ճիշտ է, ցավեր ունի, բայց դրանք չեն սաստկանում:

-Դեռ գամված է անվանասայլակի՞ն:

-Ցավոք, այո:  Երանի կարողանար վեր կենալ սայլակից ու քայլեր:

-Իսկ կարողանո՞ւմ է  նորմալ հաղորդակցվել իր հարազատների ու մտերիմների հետ:

-Հեռախոսով չէ, դրանից գլուխը ցավում է, բայց հազիվ խոսում է: Դրա համար էլ աշխատում ենք շատ մարդ մոտը չթողնել: Բարեկամներիս չեմ թողնում գալ որդուս մոտ, բայց գիտեմ, որ մեր ժողովուրդն ու սփյուռքահայերն անհանգստանում են ու իրեն շատ են սիրում:

-Որոշե՞լ եք, երբ եք Կարենին Գերմանիա տանելու:

-Այսօր գնացել տոմսեր եմ բրոնիա արել: Երկուշաբթի Կարենը Վարդան Արզումանյանի հետ կմեկնի Գերմանիա:

-Ինչո՞ւ հենց Գերմանիա:

-Գերմանիայում բուժումը  մատչելի է, բացի այդ` բուժվելու երաշխիք տվել են 80 տոկոսով, իսկ Իսրայելում երաշխիք չէին տալիս,  բացի այդ` այնտեղ բուժումը թանկ էր:

-Որքա՞ն գումար է հավաքվել այս պահին:

-Մոտ 27.000 եվրո:

-Մեր մեծահարուստներից որևէ մեկը  համաձայնվե՞լ է նյութապես օգնել:

Զանգող եղել է, բայց գործնական առումով քայլեր չեն արել: Բոլորը  աջակցողները սովորական մարդիկ են: Ես իրենց ցավը տանեմ:

Սոնա Դավթյան