Այս տարվա սեպտեմբերին Տավուշի մարզի Նոյեմբերյանի եւ Իջեւանի տարածաշրջանների 33 համայնքների ղեկավարներ իրենց եւ համայնքների բնակչության անունից դիմել են ՀՀ նախագահին, որպեսզի նա ներում շնորհի ծագումով Կոթի գյուղից Յուրիկ Հարությունյանին: Նույն խնդրանքով երկրի ղեկավարին դիմել են նաեւ երկրապահ կամավորականների միության Իջեւանի, Նոյեմբերյանի, Տավուշի բաժանմունքների ղեկավարները եւ ԵԿՄ մարզային խորհրդի նախագահը: Յու.Հարությունյանը 1992-94թթ-ին ակտիվորեն մասնակցել է Տավուշի մարզի սահմանագոտու ինքնապաշտպանությանը, մարտում վիրավորվել է, պարգեւատրվել մի շարք մեդալներով: Հրադադարի հաստատումից հետո նա զբաղվել է գործարարությամբ, նաեւ բարեգործություններ կատարել, իր ստացած եկամուտներից ամեն ամիս որոշակի գումար վճարել Նոյեմբերյան քաղաքի Հայրենական պատերազմի վետերաններին: 2008թ. հուլիսին մեղադրվելով մաքսանենգության մեջ` Հարությունյանը դատապարտվեց 8 տարվա ազատազրկման: Նոյեմբերյանի տարածաշրջանի մի խումբ վետերաններ մեզ հետ զրույցում ասացին, որ Յուրիկ Հարությունյանի դատապարտումից հետո նրա ղեկավարած սպասարկման ոլորտի շուրջ 1 տասնյակ ձեռնարկություններ փակվեցին, կրճատվեցին նրա կողմից իրականացվող անասնապահական եւ այգեգործական ծրագրերը: Վետերանները հիշեցնում են, որ 2007թ. օգոստոսի 5-ին սահմանամերձ Կոթիում մատաղի արարողության ժամանակ Սերժ Սարգսյանի կողքին կանգնած մարզպետ Ղուլարյանը մարզում կատարած աշխատանքների համար շնորհակալագիր հանձնեց Յուրիկ Հարությունյանին:
.gif)
