«Սա փակուղի չէ». Զելենսկին այն մասին, թե ինչ է կատարվում ճակատում

Ուկրաինայի նախագահ Վլադիմիր Զելենսկին ճակատում ստեղծված իրավիճակը փակուղային չի համարում։ Այս մասին նա հայտարարել է Եվրահանձնաժողովի ղեկավար Ուրսուլա ֆոն դեր Լեյենի հետ մամուլի ասուլիսում՝ մեկնաբանելով Ուկրաինայի Զինված ուժերի գլխավոր հրամանատար Վալերի Զալուժնիի The Economist ամսագրին տված հարցազրույցը։

«Սա փակուղի չէ: Ռուսաստանը վերահսկում է երկինքը: Մենք խնայում ենք մեր զինվորներին։ Ոչ ոք չի ցանկանում պարզապես նետել նրանց, ինչպես Ռուսաստանն է մսի պես նետում իր մարդկանց։ Ինչպե՞ս հաղթահարել սա: F-16, մենք պետք է սպասենք, որ տղաները սովորեն, երբ նրանք վերադառնան: Երբ ռազմաճակատում կա հակաօդային պաշտպանություն, զինվորականներն առաջ են գնում և տեխնիկա են օգտագործում»,- ասել է Ուկրաինայի նախագահը։

Զելենսկին հիշեցրել է, որ 2022 թվականին բոլորը կարծում էին, որ ուկրաինական զորքերը փակուղում են հայտնվել։ «Մի քանի ռազմական հնարքներ, և, հիշում եք, ազատագրվեց Խարկովի շրջանը», – ասել է Զելենսկին։

Մենք իրավունք չունենք հուսահատվելու։ Ո՞րն է այլընտրանքը: Ի՞նչ է, մեր պետության մեկ երրորդը պետք է տանք։ Ախր դա միայն սկիզբն է լինելու։ Մենք գիտենք, թե ինչ է սառեցված հակամարտությունը, մենք մեզ համար արդեն եզրակացություններ արել ենք։ Մենք պետք է ավելի շատ աշխատենք հակաօդային պաշտպանության մեր գործընկերների հետ, ապաշրջափակենք երկինքը և մեր կործանիչներին հարձակողական գործողություններ իրականացնելու հնարավորություն տանք։

Զելենսկին նաև ասել է, որ արևմտյան երկրներն իր վրա ճնշում չեն գործադրում՝ ստիպելով բանակցություններ սկսել Ռուսաստանի հետ։

Բոլորը գիտեն իմ վերաբերմունքը, որը համընկնում է ուկրաինական հասարակության վերաբերմունքի հետ։ Այսօր ինձ վրա ոչ ոք ճնշում չի գործադրում։ Այս ամենը եղել է պատերազմի սկզբում և պատերազմից առաջ։ Այսօրվա դրությամբ ԵՄ-ի կամ ԱՄՆ-ի ղեկավարներից ոչ ոք ճնշում չի գործադրում։ Որ մենք հիմա Ռուսաստանի հետ նստենք, խոսենք, մի բան տանք, նման բան չի լինի։