Վարչական շրջանների ղեկավարների նշանակման հարցը՝ կռվախնձոր. Դավիթաշենի եւ Նոր Նորքի նախկին թաղապետերը առանց պաշտոն են մնացել

ArmLur.am-ի տեղեկություններով՝ վարչական շրջանների ղեկավարների նշանակման հարցը նոր կռվախնձորի թեմա է դարձել ու դժգոհություններ առաջացրել նախկին թաղապետերի մոտ:

Ինչպես հայտնել էինք, Տիգրան Ավինյանն իրենց պաշտոններում վերանշանակել էր Կենտրոն, Քանաքեռ-Զեյթուն, Նուբարաշեն, Ավան, Շենգավիթ, Էրեբունի, Նորք-Մարաշ, Արաբկիր և Աջափնյակ վարչական շրջանների ղեկավարներին:

Նոր Նորք, Դավթաշեն և Մալաթիա-Սեբաստիա վարչական շրջաններում ՔՊ-ն իր տեղը զիջել էր իրենց հետ կոալիցա կազմած «Հանրապետություն» կուսակցությանը.

Մալաթիա-Սեբաստիա վարչական շրջանի ղեկավար էր նշանակվել ԵԿՄ Երևանի խորհրդի նախագահ Ռոմիկ Մխիթարյանը, Նոր Նորք վարչական շրջանի ղեկավար էր նշանակվել Տիգրան Տեր-Մարգարյանը, իսկ Դավթաշենում՝ Ալբերտ Հովասափյանը: Վարչական շրջանի նորանշանակ երեք ղեկավարներն էլ «Հանրապետություն» կուսակցությունից են:

Վերջերս քրեական սկանդալի մեջ հայտնված Մալաթա-Սեբաստիա վարչական շրջանի նախկին ղեկավար Արմեն Բարխուդարյանը երկար անգործ չմնաց։ Կարճ ժամանակ անց նա նշանակվեց ԱԺ փոխնախագահ Ռուբեն Ռուբինյանի խորհրդական. այդ պաշտոնը նա զբաղեցնում էր մինչ թաղապետ նշանակվելը:

Նոր-Նորք վարչական շրջանի նախկին ղեկավար Արմեն Մհերյանի և Դավիթաշեն վարչական շրջանի նախկին ղեկավար Ռոման Համբարձումյանի հարցը մնում է օդում կախված:

Սեպտեմբերի 17-ի ավագանու ընտրությունների ժամանակ Մհերյանն ու Համբարձումյանը ջանք ու եռանդ չեն խնայել իրենց «կուռացիայի» տակ գտնվող վարչական շրջաններում ՔՊ-ի համար ձայներ ապահովելու համար:

Հիմա, սակայն, փաստացի նրանք մնացել են անգործ, ու դժոհություններ կան ՔՊ-ից, որ իրենց ջանքերը չեն գնահատել ու այսօր իրենց առանց պաշտոն են թողել:

Ք․Մ․