Չեչնիայի ղեկավար Ռամզան Կադիրովի ավագ որդին՝ 18-ամյա Ախմաթ Կադիրովը, նշանակվել է Չեչնիայի ֆիզիկական կուլտուրայի, սպորտի և երիտասարդության քաղաքականության գծով նախարարի առաջին տեղակալի պաշտոնում, ասել է շրջանային խորհրդարանի նախագահ Մագոմեդ Դաուդովը:
«Սրտանց շնորհավորում եմ… Ախմաթ Կադիրովին Չեչնիայի Հանրապետության ֆիզիկական կուլտուրայի, սպորտի և երիտասարդության քաղաքականության գծով նախարարի առաջին տեղակալի պաշտոնում նշանակվելու կապակցությամբ: Վստահ եմ, որ այս պատասխանատու պաշտոնում նշանակումը կնպաստի մակարդակի և որակի բարձրացմանը»,- գրել է Դաուդովը Telegram-ի ալիքում։
Նախկինում Ախմաթ Կադիրովը գլխավորել էր Չեչնիայի «Առաջինների շարժում» համառուսաստանյան հասարակական և պետական երիտասարդական շարժման մասնաճյուղի խորհուրդը։ Չեչնիայի խորհրդարանի խոսնակի խոսքով՝ այս պաշտոնում նա «ամեն կերպ աջակցել է երիտասարդներին»։
«Վստահ եմ, որ նա բարձր մակարդակով կկատարի իր առջեւ դրված խնդիրները, դրա համար նա ունի անհրաժեշտ գիտելիքներ, փորձ և ցանկություն»,- հավելել է նա։
.gif)
