Այս մարդիկ նույնիսկ պատրաստ են անկախության հռչակագրից հրաժարվել. իրենց կարճ խելքով՝ դրանով կկանխեն պատերազմը. Տաթևիկ Հայրապետյան

Վերջին շրջանում Հայաստանի իշխանության ներկայացուցիչները մի թեզ են առաջ տանում, թե Հայաստանում Արցախի պետական կառույցների եւ ինստիտուտների պահպանումը վտանգ է ներկայացնում Հայաստանի համար: Այս հարցի վերաբերյալ ArmLur.am-ը զրուցել է ադրբեջանագետ, պատմական գիտությունների թեկնածու Տաթեւիկ Հայրապետյանի հետ։

-Տիկի՛ն Հայրապետյան, մի շարք պատգամավորներ, ԱԺ նախագահը եւ այլք մի այսպիսի թեզ են առաջ քաշում՝ Հայաստանում Արցախի պետական կառույցների եւ ինստիտուտների պահպանումը վտանգ է Հայաստանի Հանրապետության համար: Ի՞նչ վտանգի մասին են խոսում նրանք, ձեզ համար հասկանալի՞ է՝ ինչ վտանգ կարող են դրանք ներկայացնել Հայաստանի համար:

-Ինձ համար այդ ամենը փոքր-ինչ զավեշտալի է, որովհետեւ դրանք այն մարդիկ են, որոնք պատրաստ են փոխել Հայաստանի Հանրապետության զինանշանը, պատրաստ են հրաժարվել Հայաստանի Հանրապետության հռչակագրից, որոնք պատրաստ են զիջել Հայաստանի համար կենսական տարածքներ: Այսինքն՝ եթե մարդիկ նման զիջումների են պատրաստ՝ Հայաստանի Հանրապետության պետական խորհրդանիշերի, տարածքների եւ ինքնիշխանության հաշվին, ապա Դուք այդ մարդկանցից ուրիշ ի՞նչ էիք սպասում, չեմ հասկանում: Այսինքն՝ իրենց քաղաքականությունը հետեւյալն է՝ զիջենք այնքան, ինչքան պետք է, միայն չլինի պատերազմ: Ու այդ զիջումների պարագայում իրենք միշտ բերում են պատերազմ Հայաստանի եւ Արցախի համար:

Վերջին երեք տարիների քաղաքականությունը, պատերազմներն ու տարածքային կորուստները դրա արդյունքն են: Մարդիկ որեւէ դիմադրություն, որեւէ քայլ պատրաստ չեն անել: Դրանք այն մարդիկ են, որոնք Բաքվից թույլտվություն են խնդրում՝ Երասխում գործարան կառուցե՞ն, թե՞ ոչ: Եվ եթե այդտեղ կրակում են, ապա պետք չէ կառուցել գործարան:

-Այսինքն՝ կարո՞ղ ենք արձանագրել, որ իշխանությունները հերթական անգամ վախենում են Ադրբեջանի արձագանքից, որ սա կարող է զայրացնել հարեւան պետությանը:

-Իհարկե: Իրենք նույնիսկ վախենում են մի երկու բառ խոսել, որ Ադրբեջանը մեր երկիրը Արեւմտյան Ադրբեջան է կոչում, իրենք ամեն հնարավոր բանից վախենում են: Էլի եմ ասում՝ այդ մարդիկ նույնիսկ պատրաստ են անկախության հռչակագրից հրաժարվել: Նրանք իրենց կարճ խելքով կարծում են, որ դրանով կկանխեն պատերազմը: Բոլոր այս «կանխարգելիչ» քայլերը միայն պատերազմներ են բերել, ուրիշ ոչինչ:

-Իսկ Ձեզ համար հասկանալի՞ է՝  Արցախի՝ այստեղ տեղափոխված կառավարությունը ինչու՞ է այսպիսի պասիվ կեցվածք ընդունել: Հայաստանի իշխանությունների դիրքորոշումը հայտնի է, իսկ Արցախի՞նը:

-Ես այդ հարցով չեմ կարող մեկնաբանություն տալ, ազնվորեն եմ ասում: Ես տեղյակ չեմ, չգիտեմ նրանց որոշումները: Չգիտեմ՝ ինչ հոգեվիճակում են վերադարձել եւ ինչպիսի դիրքորոշումներ ունեն, եւ, ըստ այդմ, մեկնաբանել դա չեմ կարող:

Զրուցեց Քրիստինա Մուշեղյանը