Caucasus Heritage Watch մշակութային ժառանգության մոնիթորինգային գործակալությունը X-ի էջում տեղեկացրել է, որ հոկտեմբերի 5-ից նոյեմբերի 3-ն ընկած ժամանակահատվածում ադրբեջանցիները բուլդոզերներով ճանապարհ են բացել Շուշիում գտնվող պատմական գերեզմանատան միջով, որը հայտնի է որպես Երևանյան դարպասների գերեզմանոց: Ծառերի մեջ տեղավորված է առնվազն 78 հայերեն տապանաքար, որոնք թվագրվում են 1802-1913 թվականներով:
«Խիտ անտառը թաքցնում է գերեզմանատունը: Մենք օգտագործել ենք Շուշիի քարտեզներն ու հրապարակումները՝ դրա սահմանները գտնելու համար։ Պարզ չէ, թե քանի տապանաքար է վնասվել, բայց ուսումնասիրությունները ցույց են տալիս, որ դրանք ծածկել են ամբողջ տարածքը: Կանանց և տղամարդկանց, երիտասարդների և ծերերի տապանաքարերը պատմում են ազգակցական կապի, զբաղմունքի, հավատքի, կարգավիճակի և այլնի մասին: Եվ նրանք խնդրում են, որ հանգուցյալը հանգչի խաղաղությամբ»,- ասված է գրառման մեջ:
Գործակալությունից նշել են նաև, որ սա արդեն 5-րդ հայկական գերեզմանոցն է, որը տուժել է 2020 թվականի նոյեմբերից՝ Մեծ Թաղերի և Սղնախի ավերումից, ինչպես նաև Շուշիի և Վազգենաշենի մերձակա գերեզմանատների վնասումից հետո։
Նշվում է, որ Caucasus Heritage Watch-ը շարունակում է արբանյակներով երկնքից լուսանկարել Լեռնային Ղարաբաղում։
.gif)
